Bantu ngemanah rumah ari Bomba Sri Aman dipuji Nagie
SRI AMAN: Penyeranta enggau penusah pengidup ke ditapi seiku peranak Rumah Augustine Bunto, Bakong Lingga, ditu ke minta ngemanahka rumah iya udah nerima perati ari piak perintah nengah ejensi Opis Bomba enggau Penyah Penusah Bagi Menua Sri Aman pengudah rumah iya ke diatu dikemanah opis nya bedau lama ke udah.
Nagie Babat iya nya orang ke beempu rumah nya ngenataika pengaga ati sereta meri terima kasih ngagai piak perintah laban udah mantu ngemanahka rumah iya.
Nitih ku iya, nadai jaku ke bukai kelimpah ari terima kasih ngagai perintah ketegal pengasih udah mantu ngemanahka rumah iya.
Projek ngemanahka rumah iya nengah Projek My Beautiful Neighbourhood (NBOS) 7 ke beungkus RM10,000 udah diagih Opis Menteri Pengelantang Pendiau Kandang Mengeri, Pengawa Berumah enggau Kandang Mengeri (KPKT) alai Opis Bomba enggau Penyah Penusah Bagi Menua Sri Aman nyadi sebagi ari ejensi megai tanggungpengawa nembuka projek nya berengkah 13 Oktober lalu tembu 24 Oktober tu tadi.
Ba lansa bukai, Penguasa Bomba ke lalu nyadi Ketuai Bomba Zon 3 Sarawak Bagi Menua Sri Aman, Nik Mohamad Afiq Nik Roslan lebuh bejalai ngabas sereta bejadi projek nya madah, projek ngemanah dipejalai pengelama dua minggu udah tembu digaga pemesai bomba ari Opis Bomba enggau Penyah Penusah Bagi Menua Sri Aman.
“Aku ngenataika pengaga diri enggau pemujur projek tu sereta dikearap pangka ari projek dipejalai deka meri pengelantang ngagai Nagie Babat sebilik,” ku iya.
Afiq nerang projek tu diagih ari KPKT nengah Program NBOS 7.
“Sebagi ari inisiatif perintah meri bantu ngagai raban orang seranta,” ku iya nampung.
Berebak enggau nya mega, iya madah pemesai guna nyaga rumah ari keruga api enggau ngemeranka konsep ‘good house keeping’.
Sama bisi datai, Ketuai Opis Bomba enggau Penyah Penusah Sri Aman, William Baheng, Ketuai Skuad enggau Supervisor ke nyadi Pemesai Bomba Kanan II, Jilin Itar enggau Ketuai Tukang, Chimiam Duyu sereta bala bukai.