Adat basa rayat S’wak mela pengabang dikemegah
Sekeda temuai ari menua luar ngasaika diri chukup dibasa ngelui ari menua diri maya dibai berami
KUCHING: Adat basa rayat Sarawak lebuh mela pengabang ba tiap pengerami ti diintu lalu sama dirami pupu bansa ke enda ngira jalai pengarap, mai penyelai ngagai Sarawak.
Tuai Pemegai Menua ( TYT) Nengeri Sarawak, Tun Pehin Sri Abdul Taib Mahmud madahka, tiap kali pengerami Taun Baru China tauka Krismas tauka Hari Raya semua orang ulih sama ngasaika pengerami nya.
Ku iya, pengawa ngabang ngagai pangan diri asaika enda ibuh tauka enda beguna tang lebuh nuan ngingatka bakani sambut orang ngagai kitai sekalika maya Krismas, Taun Baru China tauka Hari Raya, tentu besai reti.
“Tu ti meri penyelai ngagai Sarawak, nyentukka kitai ulih ngasaika diri diterima tauka disambut enggau manah baka ke nyambut temuai ari menua luar ke datai nemuai kitu.
“Kekadang sekeda temuai ari menua luar ngasaika diri chukup dibasa tauka penatai sida lebih diterima di Sarawak dibandingka enggau di menua sida empu.
“Kitai patut berasai temegah ati laban ulih nempa chara idup ti meri penyedar ngagai orang iya nya ulih ngasaika pengidup begulai sama ti mayuh pupu bansa enggau jalai pengarap,” ku iya.
Tun Taib mansutka pekara nya dalam pesan Hari Krismas 2016 enggau Taun Baru 2017.
Nambahka nya iya madahka raban bansa ti sama ngerami sesebengkah pengerami deka meri peluang ngagai kitai ulih meretika pangan diri.
Berebak enggau tu Tun Taib meri Selamat Hari Krismas ngagai semua orang Kristian sereta meri Selamat Taun Baru ngagai semua rayat menua tu.
“Selamat Hari Krismas ngagai semua kita, Tuhan mai kitai beserakup, ti udah diasaika kitai sebedau tu.
“Seharitu nyema kitai dipinta ni penyauh kitai nyadi rayat Malaysia, kitai lebih Malaysia dibandingka 10 tauka 20 taun ke udah.
“Taun Baru nyau deka datai, aku gambi peluang tu meri Selamat Taun Baru 2017 ngagai semua rayat Malaysia, selamat kemisi,” ku iya.
Tu ti meri penyelai ngagai Sarawak, nyentukka kitai ulih ngasaika diri diterima tauka disambut enggau manah baka ke nyambut temuai ari menua luar ke datai nemuai kitu. Tun Pehin Sri Abdul Taib Mahmud TYT Nengeri Sarawak