Bisi 17 JKKK ba Bukit Goram nerima geran MRP ari Jamit
KAPIT: Bisi 17 bengkah Komiti Pemansang enggau Pengelikun Genturung Pendiau (JKKK) ba sitak Bukit Goram nerima geran Projek Mit Pemansang Menua Pesisir (MRP) ba sebengkah pengawa ke diatur ba sebuah hotel ditu.
Geran MRP nya mujur disuaka Kaban Kunsil Nengeri Bukit Goram, Jefferson Jamit Unyat empu.
Ba pengawa nya, Jamit madahka perintah endang semampai ngingatka nama utai diguna rayat enggau tu nyadi seiti chara ari perintah ngerapitka agi kaul enggau rayat.
“Perintah semampai merati nama utai diguna rayat nengah mayuh projek udah diperambu deka diberi ngagai rumah panjai nengah JKKK dikena ngangkatka tikas pengidup sida ba rumah panjai.
“Ukai nya aja, perintah mega bisi meri bantu bukai baka bantu e-kasih ,jalai kampung, bantu rumah, bantu sekula, BR1M, bekal karan, ai beresi enggau ke bukai,”
“Tu ngelai perintah semampai ingatka rayat ti udah meri sukung nyentuk teulihka pemujur ba pengawa bepilih taun tu tadi. Kita udah ngaga pilih ke betul. Sehari tu aku deka ngenataika peminta kita ba lima taun ke deka datai. Semua JKKK, PIBG enggau kelab sereta gerempung ke bukai deka diberi wang turu,”
“Wang turu tu datai ari perintah sereta pemayuh iya mega nitihka projek dipinta. Nya alai beguna amat bala penerima MRP nusui berita tu ngagai diri serumah bekaul enggau geran ke diberi perintah tu,”ku Jamit
Sida ke nerima chek MRP tu iya nya JKKK Rumah Robert Ngumbang, Nanga Sebatu, JKKK Rumah Tat, Nanga Entangai, JKKK Rumah Mamat, Nanga Buan, JKKK Rumah Serjin, Nanga Wai, JKKK Rumah Landi, Sungai Tub, JKKK Peter Ranggau, nanga Rau Ulu, JKKK Rumah Ekau Baring, JKKK Rumah Empawai, Nanga Sekukut, JKKK Rumah Sli, Nanga Sebelu Menuan, JKKK Rumah Riti, Nanga Tulie Atas, JKKK Rumah Ayu Nanga Tulie Baruh, JKKK Rumah Gaing, Nanga Baleh, PIBG SK Sungai Menuan, JKKK Rumah Unja, Setepus Baruh Menuan, Komiti Pemansang Raban Bansa Pelilih Kapit, JKKK Rumah Beli Nanga Ibau enggau JKKK Rumah Baso Nanga Selipik Entangai.
Bela bisi datai Pemesai Opis Pelilih Mit Kapit, Elvis Didit, Sekretari PBB Bukit Goram, Edward Manggah enggau ke bukai.