Mabong : ASADIA deka muka pampang baru ba RPR Landeh

KUCHING: Akademi Gerempung Dayak Iban Sarawak (ASADIA) deka muka seiti pampang baru ba RPR Landeh, Kota Padawan ba pun taun 2017.

Ketuai ASADIA, Mabong Unggang madah perambu numbuhka pampang baru nya kala dibantaika ngagai bala mayuh rambau pengawa nyuaka setipikit ngagai penyereta akademi kena 4 Disember 2016 tu tadi.

Perambu nya ku Mabong nerima sukung ari Kaban Kunsil Nengeri ( ADUN) Batu Kitang, Lo Khere Chiang ke mega Chairman Opis Kunsil Kandang Padawan (MPP).

“RPR Landeh seiti kandang endur dalam kuasa Kunsil Nengeri (DUN) Batu Kitang lalu pengari rayat iya nya Lo udah besemaya deka ngagihka bantu RM10,000 dikena ngemujur pengawa numbuhka pampang baru nya.

“Ngarika ASADIA, kami meri puji ngagai ADUN Batu Kitang lalu ngarap mayuh agi pengari rayat kelebih agi ari ketuai kitai Dayak meri sukung ba pengawa kitai ti deka ngangkatka pesaka enggau main asal kitai,”ku iya.

Ngenang kaul ke sama, Mabong madah ASADIA deka majakka pengawa ngintu sereta ngangkatka main asal Dayak Iban, Bidayuh pia mega Orang Ulu.

Ungkup tuju nya, ASADIA ku iya deka muka baru kelas belajar sape, tanda ajat Bidayuh enggau taboh Bidayuh ba taun ti deka datai.

Mabong nambah kelas nya deka berengkah ba minggu kedua bulan Januari 2017 di Indu opis SADIA, Kota Sentosa ditu.

Penerang ke silik sentang kelas belajar Sape tau dikenatai ngagai Vyner ( 01131802908).

Ungkup kelas belajar tanda ajat Bidayuh seretas taboh Bidayuh, tanya tau dikenatai ngagai Ozie (0128821711) tauka Jessman Bujang (012-8929782).

MUTARKA PENANGGUL RAYAT : Wan Junaidi(duduk tiga kiba) ngulu aum begulai enggau sekeda ejensi perintah ke bisi kaul enggau projek di kandang Parlimen Santubong di Kuching ensanus.