Utusan Borneo (Sarawak)

Penyuntuk bekal ai ba Tanjung Datu deka teputar

Perintah merambu nyendiaka bekal ai ari loji Batu Kitang dikena mutarka penanggul ba sitak nya

- Dikarang Chris Bishop

KUCHING: Perintah merambu nyendia bekal ai ari loji Batu Kitang ke kandang endur ngelingi Dewan Undangan Nengeri (DUN) Tanjung Datu, Lundu.

Menteri Pengeraja Asal engau Rampa Menua Dato Sri Wan Junaidi Tuanku Jaafar madah pemutus nya dikearap ulih mutarka penanggul suntuk bekal ai di sekeda kandang endur di Tanjung Datu.

“Tanjung Datu bisi napi penusah suntuk bekal ai lalu nya nyadi ketegal kapasiti loji ke diatu enda ulih mekal ai ngagai semua kandang endur.

“Dikena mutarka penusah nya, perintah merambu mekal ai ari loji Batu Kitang nguna paip besai ke Tanjung Datu,”ku iya.

Wan Junaidi mansutka jaku nya ba aum pengarang berita pengudah ngulu aum begulai enggau ejensi penyedia projek ungkup sitak Parlimen Santubong di Komplek Islam Sarawak ditu, ensanus.

Ngenang sentang projek bekal ai di Pasir Salak, iya ke mega Kaban Parlimen (MP) Santubong madah projek ke beungkus RM5.9 juta nya disadang tembu ba bulan March 2017.

“Projek bekal ai di Pasir Salak udah manggai 75 peratus tembu lalu enti nadai penanggul, ai beresi deka berengkah di bekal ba bulan April 2017,”ku iya.

Aum kemari meri awak ngagai Wan Junaidi mendingka pejalai semua projek ke bisi digaga dalam kandang parlimen Santubong iya nya ba tiga sitak DUN, Tanjung Datu, Pantai Damai enggau Demak Laut.

Entara ejensi ti bisi ngadu projek iya nya Opis Kereja Raya ( JKR), Opis Parit enggau Entali Ai ( DID), Opis Pelilih Menua, Dewan Bandaraya Kuching Utara (DBKU) enggau Opis Pengatur Pengawa Nengeri (PPN).

‘Semua projek di tiga kandang DUN tu nerima agih belanja ari Perintah Besai enggau Nengeri lalu nitihka riput ke diterima aku pagi tu, semua projek mujur 100 peratus.

“Mujur 100 peratus reti nya projek udah diserah ngagai kuntrektor ngambi tau digaga. Nadai agi penekul ba sepiak perintah,”ku iya.

Ngenang kaul bukai, Wan Junaidi madah gerija di Samariang Baru ke beungkus RM800,000 udah tembu digaga lalu deka dipenyadi ba bulan Januari 2017.

Kelimpah ari nya, iya mega madah bisi dua iti agi gerija ke benung digaga diatu iya nya gerija di Kampung Pueh enggau Kampung Sileng Dayak di Lundu.

Tanjung Datu bisi napi penusah suntuk bekal ai lalu nya nyadi ketegal kapasiti loji ke diatu enda ulih mekal ai ngagai semua kandang endur. Dato Sri Wan Junaidi Tuanku Jaafar Menteri Pengeraja Asal engau Rampa Menua

Newspapers in Malay

Newspapers from Malaysia