UPP deka mantaika perambu nama chalun ngagai Menteri Besai enggau Kepala Menteri
KUCHING: Parti Rayat Besatu (UPP) deka mantaika perambu nama chalun ke deka dikirai sida ungkup Pengawa Bepilih Besai ( Parlimen) ngagai Menteri Besai (PM) Datuk Seri Najib Razak enggau Kepala Menteri (KM) Datuk Patinggi Tan Sri Adenan Satem.
Sekretari Besai UPP, George Lo madahka parti nya deka mantaika rintai nama chalun nya laban andalka chalun nya orang ke ulih menang.
“Kami udah gawa nyendiaka servis kami ngagai rayat. Kami udah numbuhka Palan Servis Komuniti kami ba sitak selatan kelimpah deka muka ba utara enggau menua adap ke tengah Sarawak. Kelimpah ari nya, wang turu pelajar deka majak diberi dikena mantu nembiak sekula ke napi penanggul suntuk belanja.
“Laban kami udah bebendar gawa ke rayat, kami pechaya ulih nyendiaka chalun ke ulih menang, sereta diperundingka BN,” ku Lo madah ngagai The Borneo Post apin lama ke udah.
Iya madah munyi nya lebuh nimbal jaku ari SUPP bedau lama tu tadi, ke ngambu kerusi parlimen ke diungkup ngagai parti tu (UPP). Tujuh iti kerusi nya nyengkaum Bandar Kuching, Stampin, Serian, Sarikei, Lanang, Sibu enggau Miri.
Ba pengawa bepilih 2013, SUPP semina ngetanka kerusi Serian, ke agi mengkang dipangku sapit presiden SUPP, Datuk Seri Richard Riot, lalu ba sitak bukai sida alah magang.
Lo mega madah iya arapka chalun UPP nya ulih diperundingka ketuai Barisan Nasional (BN) laban Najib enggau sapit iya, Datuk Seri Dr Ahmad Zahid Hamidi kala madah nengah surat kabar nasional, BN merambu deka ngirai chalun ke ulih menang ba sesebengkah sitak.
“Menteri Besai udah madahka iya deka dulu mansik pendiau chalun ke deka bediri, ngena sistem ‘baru sereta tegap agi’ lebuh mantaika jaku nya dalam surat kabar English, lalu sapit menteri besai bisi madahka komponen parti bukai deka beratika chalun ke ulih menang, ari ngena kuota ungkup kerusi, ku iya madah lebuh dirandau pemberita surat kabar nya,” ku Lo.