Pilih pengawa betanam betupi nyadi dagang
Raban nembiak diperansang ngaul diri ba industri tu nengah mayuh program ti disediaka perintah
SAMARIANG: Mensia mayuh kelebih agi raban nembiak diperansang ngaul diri ba industri ti bepelasarka pengawa betanam betupi.
Sapit Menteri Betanam Betupi Enggau Industri Pengawa Bumai Dato Anthony Nogeh madah perintah nengah opis menteri iya bisi nyendia mayuh bengkah program, insentif sereta bantu dikena ngemujur pengawa betanam betupi.
Bengkah program, insentif enggau bantu nya ku iya sigi dikena nambah asil betanam betupi kelimpah nambah penatai pemisi sida.
“Aku ngarap sida meratika pengawa betanam betupi tu ulih nyadi sebengkah pengawa dagang.
“Betanam betupi ukai semi- na pengawa nupi jelu tauka nanam kayu sereta sayur, tang mungkur pengawa ngelaku, mungkus enggau ngangkut.
“Enti enda rinduka pengawa betanam betupi, kitai mega tau ngambi bagi ba pengawa ngelaku, mungkus sereta ngangkut,”ku iya.
Anthony mansutka jaku nya rambau bejadi Karnival Asas Tani 2016 Nengeri Sarawak ke diatur ba sebengkah kedai besai di Bandar Baru Samariang ditu, kemari.
Iya nambah, makit ungkup asil ari pengawa betanam betupi chukup besai ketegal asil nya tau dijual ba dalam menua sereta mega diekspot ke luar menua.
Ambika chunto ku iya, seiku graduet ari Perak udah mujur ba pengawa dagang ngeluar telu masin ungkup makit dalam enggau luar menua.
“Seiku agi orang dagang di Semenanjung Malaysia mega udah mujur ba pengawa ngaga cokelat lalu produk iya nya udah dijual di menua luar,”ku iya.
Anthony ke mega Kaban Parlimen(MP) Mas Gading madah entara objektif karnival Asas Tani diatur iya nya dikena ngelaku produk betanam betupi orang dagang menua tu.
Ba karnival nya, iya bisi nyuaka Geran (Insentif FAMA) K-Shoppe RM18,000 ngagai Dayang Lila Bakery, Lundu.
Insentif- Geran ba penyampau RM16,695 mega bisi diberi ngagai Orang Dagang madu kelulut, Siti Hajah Enterprise lalu Usna Marketing iya nya orang dagang ti ngasilka produk bepelasarka dagin nerima RM100,000.
Bela datai Direktor Fama Sarawak Paza Dan,Residen Kuching Shukarmin Chasimon enggau orang bukai.
Betanam betupi ukai semina pengawa nupi jelu tauka nanam kayu sereta sayur, tang mungkur pengawa ngelaku, mungkus enggau ngangkut. Dato Anthony Nogeh Sapit Menteri Betanam Betupi Enggau Industri Pengawa Bumai