Utusan Borneo (Sarawak)

Juluk pengelanta­ng enggau pemansang patut ditegap agi

Rayat di Sarawak diperansan­g terus ngemeranka adat ngabang ngagai pangan diri taja bebida pengarap

-

KUCHING: Kepala Menteri Datuk Patinggi Tan Sri Adenan Satem minta rayat Sarawak ti mayuh pupu bansa enggau jalai pengarap terus ngenegapka juluk ke ulih mai pengelanta­ng enggau pemansang ngagai nengeri tu.

Iya mansutka pekara nya dalam pesan Hari Krismas 2016 enggau Taun Baru 2017.

Iya mega minta raban bansa ke ukai bepengarap Kristian, datai ngabang ngagai rumah tebuka raban ti bepengarap Kristian maya musim pengerami tu.

“Dalam pejalai kitai ke deka ninggalka taun 2016 sereta nyingkang ngagai taun baru 2017, aku mai semua kitai terus ngenegapka juluk diri nuju pengelanta­ng enggau pemansang ngagai Nengeri Sarawak enda ngira nama kapasiti enggau tanggungpe­ngawa.

“Lalu maya musin pengerami tu, aku minta semua raban bansa di nengeri tu terus ngemeranka adat ngabang ngagai pangan diri ti enda sama jalai pengarap tauka enda sama jalai pengidup enggau kitai.

“Aku enggau kami sebilik meri Selamat Hari Krismas ngagai semua orang ti ngerami Krismas enggau Selamat Taun Baru 2017 ngagai semua rayat Nengeri Sarawak,” ku iya.

Ngenang pasal pemaik enggau pengelanta­ng rayat nengeri tu ti mayuh pupu bansa enggau jalai pengarap, Adenan madahka peranak Sarawak baka diri menyadi, bebasaka bansa enggau jalai pengarap pangan diri.

Ku iya,sekeda menua di dunya tu benung charut tang rayat Sarawak lebih agi sekeda ruang bilik ulih diau dalam pengelanta­ng taja pan serumah nya bisi ke Kristian enggau Muslim.

“Sida ulih diau segulai sereta jalai pengarap ukai isu laban sida pechaya ‘ jalai pengarap nuan jalai pengarap nuan, lalu jalai pengarap aku iya nya jalai pengarap aku’.

“Nya meh chara kitai di Sarawak seratus taun ke udah, lalu nya meh chara ke patut dikemerank­a belama jemah ila,” ku iya.

Betaun lama ke udah ku iya, rayat Sarawak ulih milih barang bagi jalai pengarap ke deka dipegai, ambika chunto raban Kristian ulih ngena leka jaku Allah sereta nadai ‘Hudud’ di Sarawak.

Dalam pejalai kitai ke deka ninggalka taun 2016 sereta nyingkang ngagai taun baru 2017, aku mai semua kitai terus ngenegapka juluk diri nuju pengelanta­ng enggau pemansang ngagai Nengeri Sarawak enda ngira nama kapasiti enggau tanggungpe­ngawa. Datuk Patinggi Tan Sri Adenan Satem Kepala Menteri Sarawak

Newspapers in Malay

Newspapers from Malaysia