Jam pengerami awak pemadu manah endur rayat begempung

KUCHING: Jam pengerami nyadi awak ke pemadu manah endur ngempung sereta nyerakup rayat pupu bansa ti ngembuan batang pengarap ke bebida di menua tu.

Dikena ngemujur juluk nya, Menteri Pengeraja Asal enggau Rampa Menua Datuk Seri Wan Junaidi Tuanku Jaafar minta rayat Sarawak majakka tradisyen begusung pangan diri rambau pengerami Hari Krismas enggau Taun Baru Cina.

“Tradisyen tu nentuka Sarawak deka terus nyadi chunto ngagai nengeri bukai ti ngemeranka gaya pengidup lantang sereta likun kelimpah ti beserakup tajapan diwan mayuh pupu bansa,’ku iya.

Iya mansutka jaku nya ba aum pengarang berita pengudah ngulu aum begulai enggau ijinsi perintah ke diatur di Opis Residen Kuching ditu, ensanus.

Ngarika Opis Menteri sereta ke nyadi Kaban Parlimen (MP) Santubong, Wan Junaidi meri jaku Selamat Hari Krismas enggau Taun Baru ngagai semua peranak Malaysia.

Ngenang kaul ke sama, Wan Junaidi minta peranak nengeri tu ngintu pemaik kaul entara tiap pupu bansa ngambi pengelikun menua mengkang diintu manah.

“Pekara tu berat ngambi kitai ulih meranka gaya pengidup, main asal diri enggau lantang lalu enda ngeruga batang pengarap sida ke bukai.

‘ Enggau nya kitai ulih beserakup ngambika menua likun lalu nadai bemusuh enggau pangan diri,’ ku iya.