Pengerami Pra-Krismas Genturung Pendiau Boulder Built richah

KUCHING: Pengerami PraKrismas Genturung Pendiau (GP) Boulder Built diintu enggau penuh pengerichah, apin lama ke udah.

Nitihku Tuai Rumah (Tr) GP Boulder Built Tr Spencer Birai, sekeda program ke diperambu udah mujur diatur malam nya.

Nyerumba pengerami Pra- Krismas nya, JKKK genturung pendiau nya bisi nyuaka setipikit ngagai 19 iku orang indu ke udah mujur belajar nusuk marik empang moden.

Dua iku nembiak ke teulihka penyulut dalam peresa Ujian Penilaian Sekolah Rendah (UPSR) 2016 mega nerima insentif ari JKKK nya.

Nambahka nya, dikena ngingatka orang ke tusah, dua iku kaban ke masuk sepital mega nerima pemeri sereta bisi enam iku penerima nerima hamper Krismas ari JKKK GP Boulder Built.

Dikena ngerami malam nya mega, bisi diatur pekit karaoke.

Kelimpah ari nya, nitihku Spencer, dalam jaku pengelalu pengerami malam nya , iya bisi ngenataika sebana tauka penanggul ke ditapi peranak genturung pendiau ke dipegai iya.

“Entara penanggul ke ditapi peranak GO kami ditu iya nya lampu jalai ke enda chukup sereta ngarapka Majlis Perbandaran Padawan (MPP) ulih nyendia lampu jalai nya dalam taun baru.

“Parit ba GP kami pan nadai dikemanahka, ngarapka piak bekaul ulih beratika pekara tu.

“Kami mega nadai balai endur ngatur program, nya alai naka ke diatu kami ngatur program ba rumah aku empu,” ku iya seraya ngarapka pengari Kaban Kunsil Nengeri ( ADUN) Batu Kitang ti mega Chairman MPP Lo Khere Chiang ke datai ngagai pengerami nya ulih madah penanggul nya ngagai Lo.

Cr. Yeo Eng Kuang ngarika Lo datai sereta bejadika PraKrismas GP Boulder Built.

PENGGI NUAN: Yeo ke bisi datai diberi awak nyuaka setipikit ngagai pesereta ke udah mujur masuk kelas nusuk marik empang moden.

PEMERI KRISMAS : Datin Laceylona Thomas nyuaka hamper ngagai Dari (kiba) ti betapi enggau penyakit kronik, seraya disempulang Tr. Spencer (kanan).

TEPA: Tr. Spencer ngerasukka baju burung ngagai Yeo , ke nyadi temuai dipebasaka malam nya.

SELAMAT HARI KRISMAS: Raban koir JKKK GP Boulder Built ti nyadaka lagu Krismas, malam nya.

KELAI SUKUNG: Entara peranak GP Boulder Built ke datai ngerami Pra-Krismas.