KRT Selatan Kapit nyuaka pemeri Krismas ngagai raban pesakit
KAPIT: Kaban Rukun Tetangga ( KRT) Selatan Kapit mujur ngatur Program Ngabas Sepital Kapit beserimbai enggau pengerami Krismas seraya nempa kaul enggau bala pesakit ba sepital nya.
Bela bisi enggau ngemujurka program tu iya nya bala staf sepital tu empu, Matron Mavis Baso, Sister Rantie Jeni, Sister Denau Laut, Sister Wong Yieng Fei, Misi Doris Jaret, Wesly Johnny, Vanessa Pala, kelimpah kaban KRT baka Ma Tian Ho, Sng Geok Yieng, Ting Bee Eng enggau ke bukai.
Pengawa nyuaka pemeri beserimbai enggau program tu dipejadika Pemesai Opis Penyerakup enggau Intergrasi Nasional, Latifah Atong.
Kaban KRT ukai datai enggau jari puang tang mega bisi mai pemeri ungkup pesakit ba wad anak mit, wad orang beranak, wad beputung, wad indu enggau laki.
Chairman KRT tu Ma Tian Ho, madah program nya dipejalai dikena meri peransang sereta bekunsika pengaga ati nyerumba Krismas enggau Taun Baru enggau bala pesakit ba Sepital Kapit.