Bala tuai raban bansa patut belajar nguna perengka teknologi moden
KUCHING: Ketuai raban bansa nyengkaum bala tuai rumah ba sitak Engkilili dilalau belajar nguna perengka guna teknologi moden baka komputer, tauka telefon binching ( smart phone) dikena ngemuntangka pengawa sida lebih agi dalam ngereja pengawa beseharisehari.
Kaban Kunsil Nengeri (ADUN) Engkilili Johnicol Rayong Ngipa lebuh nyebut pasal pekara tu madahka ketuai pupu raban bansa patut bepengelandik nguna teknologi moden ngambi ngemuntangka agi pengawa sida.
“Ketuai raban bansa, sereta tuai-tuai rumah di sitak Engkilili nyangka kala nguna komputer tauka ‘smart phone’ ke ulih dikena ngadu pengawa enggau muntang.
“Nya alai, sida patut belajar nguna ‘microsoft word’ tauka ‘excel’ ngambi senang ngaduka ripot,” ku Rayong maya dirandau di rumah iya di Taman Beautiful Land, ditu, kemari, ti mega beserimbai enggau Rumah Terbuka Hari Krismas, diatur Rayong empu.
Sebedau tu, komputer 1Malaysia mayuh udah diberi ngagai ketuai raban bansa enggau tuai-tuai rumah.
Dalam dunya moden diatu beratika semua pengawa digaga, ngena komputer tauka ‘smart phone’ magang. Nya alai beguna amat bala ketuai pupu raban bansa ngembuan pengelandik ngena ‘aplikasi’ nya lebuh ngaga ripot tauka pengawa bukai.
“Enti ketuai pupu raban bansa tauka tuai rumah nemu ngena ‘aplikasyen whatsapp’ sida deka muntang agi ngatur pengawa diri.
“Ambika chunto bisi pekara berat patut diputar. Ambi gambar lalu anjung terus ngagai aku. Nyadi chara tu ulih ngelimat jam sereta muntang kelimpah ari surat rasmi,” ku iya.
Iya nandu, bala nembiak rebak baru diatu mayuh landik agi ngena telefon pintar lalu bala ketuai raban bansa tau belajar ari bala nembiak, ku iya.