PRU14: PKR sedia besilih penuduk enggau DAP

Tu nimbal pengeran DAP Sarawak ti deka nganjung chalun bediri ba penuduk Parlimen Miri

KUCHING: Parti Keadilan Rakyat ( PKR) Sarawak sedia berundingka atur besilih penuduk parlimen enggau Parti Tindakan Demokratik (DAP) ba Pengawa Bepilih Besai Ke-14 (PRU14) tu ila.

Pekara nya dipansutka Chairman PKR Sarawak Baru Bian ti madah PKR seruran lantang berandauka sentang isu nya enggau DAP Sarawak.

“Kitai ulih berandauka sentang pekara tu lalu nadai salah kitai sama bela bisi seiti penuduk ke tau ditukar,” ku iya.

Iya mansutka jaku nya lebuh dipinta nimbal pengeran DAP Sarawak ti deka nganjung chalun bediri di Pe- nuduk Parlimen Miri maya PRU14 rambau pengerami ngelalu pengabang Hari Krismas di rumah iya di Jalai Setia Raja ditu, kemari.

“Baka ngelama tu, kitai (PKR) sigi seruran sedia berandauka agih penuduk ungkup PRU14 tu ila,” ku iya ke mega Kaban Kunsil Nengeri (ADUN) Ba’Kelalan.

Ngenang sentang PRU14, Baru madah pengawa nya engka enda diadu ba awak ke semak tu ketegal isu ti bekaul enggau sukung rayat ngagai Barisan Nasional (BN) maya ke diatu.

“Engka iya (Menteri Besai Datuk Seri Najib Tun Razak) nguji ngadu di Sabah dulu, iya nya ngadu pengawa bepilih nengeri di Sabah dulu sebedau PRU14, dikena meda sukung rayat ngagai BN,” ku iya.

Ba PRU13, Baru bediri ba penuduk Parlimen Limbang ngelaban Hasbi Habibollah (BN) ke alai iya alah nengah bida undi 8,301.

Rambau nya, PKR menang di Parlimen Miri nengah chalun, Michael Teo Yu Keng ti bulih 26,909 undi ngalahka chalun BN, Sebastian Ting Chiew Yew ( 24,917) enggau chalun STAR Chong Kon Fatt ( 306).

Entara temuai ke bisi datai ke pengerami ngelalu pengabang nya ensanus, ADUN Batu Lintang See Chee How, Mandal Presiden Orang Indu PKR Voon Shiak Ni sereta Ketuai Indu PKR Sarawak Nur Hanim Hana Mokhsen.

Kitai ulih berandauka sentang pekara tu lalu nadai salah kitai sama bela bisi seiti penuduk ke tau ditukar. Baru Bian Chairman PKR Sarawak