Nyumpit seiti ari pengawa lama ti majak dikerinduka mensia mayuh
SIBU: Diau ba puak kampung besaum pengidup enggau macham bansa jelu siga nejuka bansa Iban dulu kelia datai runding ngaga kereban ukai semina dikena ngembar tubuh aja tang berundingka kereban ti ulih dikena ngidupka diri.
Ketegal jalai pengidup ti baka tu dia bansa Iban teulihka runding ngaga kereban lalu seiti iya ke agi mengkang dipeda kitai maya tu iya nya sumpit.
Sumpit mega ditemu kitai seiti ari senyata nyempulang ilang enggau terabai maya kitai Iban nurun ngayau baka maya deka ngalahka bansa bukai ngiga menua baru ti nyadi seiti ari chara pengidup bansa Iban maya nya.
Tang diatu, enda semina tuju sumpit nyau aja bisi bebali tang chara begagaka sumpit mega bisi jauh muntang agi digaga ari aki ini bansa Iban suba.
Diatu kitai ulih meda sumpit nyau majak dikerinduka orang ukai semina bansa Iban aja tang mega bansa bukai.
Seiti ari pengawa ke tampak dipeda iya nya diatu sumpit nyau dikena orang bepekit maya bisi pengerami besai baka Pengerami Mantaika Main Asal Borneo (BCF), Pesta Limau sereta mayuh agi pengerami ke bukai.
Meda sumpit tauka pengawa nyumpit (pekit) majak nerima timbal ti manah ari mensia mayuh dia seiku ari peranak Rumah Jana, Batu Matup Julau, beambi ulih ari awak nya ngaga sumpit ti ba iya nyadi seiti ari jalai dikena nambahka penatai pemisi sida sebilik.
Stanley Ngelambung maya ke berandau enggau pengarang berita ba Pakan, empai lama tu tadi enda kakang bekunsika chara iya ngaga sumpit ngena chara moden.
Ngepunka randau, iya madahka diri tebuka runding ngaga sumpit meda bini iya ngambi bagi ba pekit nyumpit maya sebengkah pengerami di Kuching bisi diatur, urung tujuh taun sebedau tu.
“Maya nya, bini aku mujur bulih lumur dua ngena sumpit ke dbeli ari kedai China enggau rega RM380.
“Udah nya, iya belabuh rindu sereta suah bendar bulih pemujur ba pekit nyumpit nyentuk datai ba menua Indonesia,” pia ku iya madah.
Ku Stanley, pengerindu iya ngaga sumpit tu belabuh maya iya nyayat ujung sumpit bini iya tadi laban ke bilung ba ujung.
Ari nya, iya tepedaka dalam sumpit nya digaga ke orang ngena paip aluminium.
“Udah nya, aku belabuh nguji ngaga sumpit bepun penemu ari ke diulih ari ujung sumpit ke udah ditetak nya,” ku nerang.
Ngerintai pengawa ngaga sumpit, iya madah, keterubah, iya melah kayu, besai 2x2 inchi enggau panjai 7.7 kaki lalu ditebuk sepiak-sepiak.
Nangkan ke nya, paip aluminium ditepu sebedau sepiak-sepiak kayu nya digam ba pengelama dua tauka tiga hari.
“Sepengudah nya, kayu tu tadi diketam lalu dialuska manah agi tauka digerenis sereta diukir,” pia ku iya sambil madah pengawa iya tu bisi disaup bini iya.
Stanley madah, sumpit iya digaga ari macham bansa kayu baka Meraka, Martulang, Kapur, Renggas, Tapang tauka Jati.
Kayu nya ku iya, dibeli ari orang tauka bisi mega diberi bala bakih.
Stanley ti mega seiku ari raban Gerempung Nyumpit Julau madah, iya ulih ngaga urung tiga iti sumpit seminggu lalu tu ku iya enda tetapika peminta ari mensia mayuh nyengkaum ari raban gerempung sida empu.
Bisi mega sumpit iya diudar ngagai Semenanjung Malaysia tang pemanjai sumpit nya ditetak pandak mimit.
Rega sumpit Stanley belabuh ari RM200 nyentuk RM300 ke atas, nitihka bansa kayu enggau ukir sumpit.
Kelimpah ari sumpit, iya mega bisi ngaga laja ke digaga ari fiber enggau punggup.
Ketegal ti mayuh nerima peminta, iya madahka diri bisi penanggul ba kereban dikena ngaga ukai semina enda chukup tauka enda lantang dikena tang mega ungkus bebelika kereban nya bangat mar.
“Tang ketegal ngaga sumpit tu nyadi pengerindu aku, aku enggau naka ulih mengkang begagaka sumpit.
“Nyema bisi piak ti bekaul ulih beberika bantu mimit, aku meri besai terima kasih,” ku iya madah enggau andal.
Stanley enggau awak tu, andal amat enti pengawa tauka pekit nyumpit ulih diangkatka agi nyentuk dipekitka ba renggat antarabansa laban pekit tu dikena ngembuan awak ke manah dikerembaika nyentuk ngagai Semenanjung Malaysia kelimpah ba menua Indonesia pekit tu lama udah diatur.
Iya madahka diri berasai temegah ati laban Kaban Kunsil Nengeri ( ADUN) Tamin Chirstopher Gira Sambang seiku ari pengari rayat Iban andalka pengawa nyumpit ulih disungkakka agi nyadi pekit bukai baka ‘dart’ enggau ‘memanah’.
Penemu tu dibantaika Gira maya dipebasa bejadika Pekit Nyumpit ke diatur beserimbai enggau Pengerami Mantaika Main Asal Dayak Borneo (BDCF) di Sibu, empai lama tu tadi.
“Enti ulih, kitai arap pen- gawa tu tau diajar ba sekula ngambika bala nembiak ngembuan pengerindu nyumpit iya ke mega seiti ari pengawa lama bansa kitai Iban.
“Enggau chara tu, main lama bansa kitai ulih dibantaika ngagai bansa bukai lalu tu deka ngasuh kitai berasai temegah ati ke pengawa lama aki ini kitai tu,” pia ku iya.
Nambahka nya ku iya, perintah tauka opis ti bekaul anang sanggu ngungkupka belanja ngagai komiti baka gerempung sida tauka gerempung ke bukai dikena ngatur pekit nyumpit enggau chara ti besai agi.
Iya madah, perais ti engkeman sereta chakah mantaika main tu ngagai menua luar deka matak agi pemekit ke bukai nyentuk ari menua bukai baka Indonesia datai ngambi bagi ba pekit ke diatur ba menua tu.
“Gerempung kami ulih nyaup ngatur pekit tang kami randaka saup baka ari puku belanja ngatur pekit,” ku iya ngujungka randau.
Ba pekara ti bekaul, mensia mayuh ti bisi ati deka meli sumpit Stanley tau betelefon ngagai iya nengah lumur 0135739103.