NGO diperansang nyaup perintah mantu orang tusah
Tanggungpengawa tu ukai semina dilempai ngagai perintah aja tang patut patut dipejalaika semua
KUCHING: Kelab tauka gerempung ukai dikuasa perintah ( NGO) diperansang bela mantu mensia mayuh bisi penusah, lalu ukai semina ngelempaika tanggung pengawa nya ba perintah aja.
Kaban Kunsil Nengeri (ADUN) Tupong, Fazruddin Abdul Rahman madah baka ke dipeda diatu, gerempung, serakup tauka kelab udah majakka pengawa sida bejalaika Tanggung Pengawa Rama (CSR) ungkup program pengelantang pendiau.
“Ambika chunto kitai meda raban kelab motosikal di mengeri besai tu mayuh udah ngatur program pengintu pengelantang pendiau, nulung sida ke bisi penusah.
“Program manah baka tu ulih negutka agi kaul antara kelab enggau komuniti. Aku sigi nyukung pengawa tu, laban siruka nasip orang bukai.
“Anang semina ngelem- paika tanggung pengawa nya ngagai perintah aja, laban kitai pan tau mantu.
“Tanggungpengawa tu endang manah diatur dikena ngemetulka peragam mensia mayuh ngumbai pengawa mantu orang tusah semina dipegai perintah aja,” ku Fazruddin ke mega beterima kasih ngagai kelab nya ke deka mantu iya meri tulung ngagai orang tusah ba sitak DUN Tupong.
Iya madah munyi nya lebuh bejadika ‘Belia Bikers Bersatu’ (3B) ke berambaika jaku ‘One Heart Rider’ begulai enggau Angkatan Belia Sinar Serapi sereta digulu urung 100 iku kaban kelab mutosikal nya, nyengkaum komuniti Taman Dahlia di Matang ditu, kemari.
Iya mega madahka pengawa ngintu pengelantang pendiau baka tu, tanggung pengawa ke dikereja begulai, ukai tanggungpengawa kediri tauka ukai semina tanggung pengawa pengari rayat, tuai pemesai, chairman ‘Kejiranan Rukun Tetangga’ ( KRT) aja.
“Sebarang bantu ulih diberi, nadai ngira penyampau nya kebuah iya patut dipejalaika begulai,” ku iya.
Sebedau nya, Chairman Pengatur ti mega nyadi Presiden Begempung 3B Mohamad Zakaria Hanadin madah, pemisi tulung ari raban kelab motosikal nya udah mujur ningkah peragam negatif komuniti ke ngumbai kelab motosikal tu (bikers) semina bejalai konvoi aja.
“Aku ngelaluka sebarang NGO deka bekerejasama enggau kami bejalaika pengawa baka tu dudi hari,” ku iya.
Berebak enggau nya, Fazruddin bisi ngabas rumah dua iku melaki bini ke buta, Ibrahim Abdullah enggau bini iya, Rakyah Langgiri ke kala diau ba rumah orang buta (di Jalai Ong Tiang Swee), ketegal palan nya benung dikemanah seduai melaki bini diasuh ngiga rumah ke bukai.
Unit ba flat Taman Dahlia ditulung Fazruddin empu, ke benung ngiga unit puang ungkup sida menyanak diau.
Kemari, Fazruddin bisi ngabas ruang bilik tu ke bisi anak seiku, Naziah Ibrahim beumur 12 taun) nerima tulung ari Bikers Belia Bersatu (3B) ke bisi nganjung barang elektronik baka televisyen, mesin basu enggau peti ais.
Entara kelab Bikers ke sama besaup meri bantu nengah program pengasih tu iya nya, BikersMania Brotherhood (BMB), Lady Bikers Kuching (LBK), City Bikers Group (CBG), Borneo of Foundation Dash Bikers (BFDB), Sarawak Z800 Comunity (Z8C), Brotherhood of Skyline Society (BOSS) sereta sekeda kelab bukai.
Ambika chunto kitai meda raban kelab motosikal di mengeri besai tu mayuh udah ngatur program pengintu pengelantang pendiau, nulung sida ke bisi penusah. Fazruddin Abdul Rahman ADUN Tupong