Masing ngabang Krismas ngagai rumah Duta Malaysia ba Sepanyol
SIBU: Sapit Kepala Menteri Tan Sri Datuk Amar Dr James Jemut Masing bisi ngabang ngagai rumah seiku ari Duta Malaysia ke gawa ba Sepanyol, Dato Kennedy Jawan.
Kelimpah Masing, pemesai bukai ke bela ngabang ngagai rumah Kennedy iya nya Sapit Menteri Luar Nengeri Dato Sri Reezal Merikan.
Tu ngujungka pengerami Krismas ke diintu Kennedy enggau sida sebilik di Sepanyol taun tu richah agi ari taun ke udah.
Enda tinggal datai ngabang maya tu iya nya dua iku menyadi Kennedy empu, Direktor Opis Ai Sibu Dato Alice Jawan enggau Chair of Tun Abdul Razak ba Ohio University, Amerika Syarikat, Profesor Dr Jayum Jawan kelimpah bala kaban belayan ke bukai.
Penatai bala pengabang endang disambut sida sebilik enggau ati ti gaga sereta basa ke chukup.
Awak nya mega dikena sida sebilik berami sereta negutka kaul begulai enggau pangan diri enggau bala pengabang ari pupu bansa.
Pemanah sida sebilik tu mega berupai ngayanka pemanah adat enggau basa rayat Sarawak.