Anang ngelimpangka pemanah pengarap ketegal ngiga untung
Pengarap tu datai ari Tuhan lalu enda patut salah kena, ku Jamal
SIBU: Ngetanka pengelikun jalai pengarap nyadi penguji ke berat maya hari tu bepun ari ulah sekeda orang ti nguji ngelimpangka pemanah pengarap ketegal deka ngiga penguntung ngagai diri empu.
Chairman Gerempung Gerija Sarawak (ACS) Pampang Sibu Venerable Archdeacon Jamal Senada madah, pengarap tu datai ari Tuhan lalu enda patut salah kena.
“Ke beguna diatu iya nya baka ni kitai ulih ngetanka pengidup ti likun.
“Nya alai, kitai ngarapka nadai orang sengaja ngena pengarap sida ketegal deka ngiga penyenang ngagai diri empu aja,” pia ku iya madah.
Iya mantaika jaku tu maya pengawa Begempuru Antara Pengarap beserimbai enggau Hari Krismas ke diatur Opis Menteri ACS Sibu ba Gerija St John’s Anglikan ditu, kemari.
Sama bela datai maya tu iya nya Presiden Persidangan Tahunan Gereja Methodist Cina Sarawak Reverend Dato Dr Su Chii Ann, Chairman Komiti Masjid An-Nur Sibu Latiff Kupon sereta sekeda ketuai pengarap ari macham bengkah gerija enggau kuil di Sibu ditu.
Nambahka jaku iya, Jamal madahka semua bengkah jalai pengarap endang ngembing mensia nuju pengidup ti likun sereta lantang.
“Kitai rayat Malaysia tu patut berasai temegah ati laban perintah enda nagang kitai mekuhka jalai pengarap.
“Ari nya, kitai patut ngetanka pengelikun taja kitai enda sama jalai pengarap,” ku iya madah baru.
Program ke diatur nya kala diatur taun seiti tadi alai maya nya Gerija Methodist nyadi komiti pengatur.
Program nya digulu pupu raban bansa enggau pengarap baka ACS Sibu (Roman Katolik, Methodist, SIB, Anglikan), gerempung Buddha, Sikh enggau kuil Hindu.
Keterubah program tu diatur maya Rumah Tebuka Masjid An-Nur Sibu ba taun 2015 suba.
Nya alai, kitai ngarapka nadai orang sengaja ngena pengarap sida ketegal deka ngiga penyenang ngagai diri empu aja. Venerable Archdeacon Jamal Senada Chairman ACS Pampang Sibu