M’sia seruran ditapatka temuai ketegal pengelikun
SRI AMAN: Malaysia nyadi sebuah menua ti seruran ditapatka bala temuai luar laban menua tu tebilang enggau pengelantang sereta likun endur nemuai.
Sapit Menteri Dalam Menua, Masir Kujat madah, Malaysia mega tebilang enggau bemacham adat enggau main asal sereta mega penyerakup pupu bansa.
“Ketegal pemisi tu mih nempa Malaysia nyadi sebuah menua ti nyelai alai rayat ulih diau likun sereta nelap enggau pangan diri.
“Genap iku temuai ke datai nemuai ngagai menua tu endang deka becheritaka pemanah sereta penyiru basa peranak lebuh mulaika diri ngagai menua asal sida,” ku iya.
Iya mansutka jaku tu lebuh bejaku ba Program Mantar Krismas bepalan ba Rumah Rengkang, Lepong Empeliau ditu, apin lama ke udah.
“Perintah andal amat penyerakup enggau pengelantang terus dikemeran pulaika pemaik semua bansa ke diau di menua tu.
“Nya alai, penumbuh mayuh bengkah gempung baka Komiti Pemansang Enggau Pengelikun Genturung Pendiau (JKKK), Kawasan Rukun Tetangga ( KRT), PERWANI, Komuniti 1 Malaysia (K1M) enggau ke bukai nyadi sebuah gempung ari pupu bansa terus nerenak sereta ngetanka semangat beserakup enggau bekerejasama,” ku iya.
Berebak enggau nya ku iya, genap iku kaban gempung tu patut ngembuan mayuh penemu dalam semua pekara sekalika ari sukut politik, ekonomi enggau nerenak pemanah ulah nyadi ‘senyata’ dalam pengawa komuniti nyadi ejen ngenataika penerang ngagai bala rayat sereta sida tu mih deka nyadi chunto enggau teladan ngagai bala komuniti tauka raban bansa ke diau besemak enggau sida.
“Kitai andal, pemisi gempung ke bansa tu nyadi tiang pemun ngenegapka penyerakup raban bansa, ulih terus ngemai ubah ngagai rayat ngambi juluk Gagasan 1Malaysia ulih dijapai nengah kaul pupu bansa di serata menua ba genap aktiviti diatur perintah.
Nya alai, kitai bela beserakup sereta sejalai dalam pemansang menua Malaysia enggau Sarawak kelebih agi pulaika pengelantang rayat.
Sama bisi datai, Ketuai Kunsil Opis Pelilih Menua Sri Aman (MDSA), Richard Tawan Sedu, Temenggong Samuel Lawen, Penghulu Bailey Gamang sereta bala ke bukai.