Ubah ba atur baru ‘Cheap Sale’, ‘Mega Sale’ besiping: Violet Yong

KUCHING: ‘ Cheap Sale’ tauka ‘Mega Sale’ ti ditetapka Perintah Besai nengah Opis Menteri Dagang Dalam Menua, Koperasi enggau Pengawa Bebeli Barang (KPDNKK) lima kali dalam setaun baka ke udah, semina dikemendarka diatur empat kali aja dalam setaun berengkah ari taun baru tu ila, nyengkaum maya hari besai Gawai Dayak di Sarawak sereta Pesta Kaamatan di Sabah.

Kaban Kunsil Nengeri ( ADUN) Pending, Violet Yong madah bedau lama tu tadi, Menteri KPDNKK Dato Sri Hasan Malek ngaga pemadahbekaul enggau ubah ‘Cheap Sale Price Regulations 1997’ nya, ke alai ‘Mega Sale’ tauka ‘Cheap Sale’ dikurangka ngagai empat kali setaun (ari lima kali).

“Ari ubah tu, opis menteri nya enda ibuhka hak penguna kelebih agi di Sabah enggau Sarawak, laban enti diperatika timpuh empat kali ti ditetapka nya ke timpuh 1 Mac ngagai 30 Mac, 15 Jun ngagai 31 Ogos, 1 November ngagai 31 Disember lalu siti agi haribulan bepanggai ba palan bebeli enggau orang dagang nya empu.

“Ari 3 iti timpuh ke diberi nya, kelebih agi ngagai komuniti Iban tauka Bumiputera Dayak bukai di Sabah enggau Sarawak, Hari Gawai Dayak enggau Pesta Kaamatan diinru ujung bulan Mei enggau pun bulan Jun.

“Enti diperatika timpuh jual murah nya, udah ngelui ari maya ngintu pengerami Gawai Dayak enggau Kaamatan. Nama reti baka nya, baka ni ku bala pangan kitai ke bansa Bumiputera Dayak enda kena bungkur timpuh ti ditetapka nya,” ku Yong seraya madahka ubah atur nya enda betatika Bumiputera Dayak, sama baka Perintah Besai ti enda ‘sensitif’ enggau orang Sabah, Sarawak.

Iya madah munyi ba aum media ti diatur di Indu Opis Parti Tindakan Demokratik (DAP) ditu, kemari.

Ngelama tu, kimpin jual murah lima taun sekali di serata menua Malaysia, lalu berengkah taun baru tu ila, empat kali aja.

“Ari ubah undang-undang nya, sekali agi Perintah Besai enda ibuhka hak orang Sabah enggau Sarawak. Kitai agi disiping,” ku iya.

Ku iya baru,atur netapka haribulan nya semina deka ngenusahka rayat, palan bebeli barang enggau orang dagang aja laban semua palan bebeli barang enda tau enda nitihka timpuh ti udah ditetapka Perintah.

“Aku deka agi meda palan bebeli barang tauka orang dagang netapka haribulan sida empu. Ambika chunto, baka palan bebeli barang Parkson, Giant, Metrojaya enggau ke bukai).

“Penguna pan enda irau, enda ibuh nganti bisi jual mu- rah, nganti timpuh ke udah ditetapka. Tambah, kitai pan ukai orang ke seruran bisi duit belama enti nganti maya timpuh nya.

“Aku ngarapka KPDNKK nyerenih baru polisi nya,” ku iya.

Ku Yong, lebuh opis menteri nya ngaga polisi nya, sida patut beratika ari sukut penguna menua tu,ukai betatika orang ari menua luar ti datai bebeli barang di menua kitai.

“Ku menteri nya, enti timpuh nya ditetapka, KPDNKK ulih bekerejasama enggau Opis Menteri Dagang Temuai, Seni enggau Adat Pesaka, matak mayuh agi temuai datai bebeli barang kitu.

“Reti nya kitai tu meri penguntung ngagai temuai ari menua luar, bah...bakani ku orang kitai empu deh? Perintah patut berundingka rayat menua tu dulu.

“Baka temuai ari menua luar, sida enda mayar GST laban sida iya ulih ngambi ‘reba’ dalam GST. Enti Sida meli baju, beg sereta barang ke mar, sida ulih ngambi rebat GST ba Padang Bilun, tang orang kitai empu enda ulih,” ku iya.