Apai indai kiruh bebelika perengka sekula bala anak ba minggu ke penudi kemisi
KUCHING: Minggu ke penudi kemisi sekula ti tembu ujung minggu tu, peluang ke penudi endur apai indai begigaka perengka sekula nyengkaum baju, tanchut, beg, enggau kasut sekula, sebedau sekula berengkah baru 3 Januari 2017.
Tinjau Utusan Borneo di mengeri tu kemari, agi bisi sekeda palan bebeli barang nyendiaka rega murah nyengkaum kedai dalam India Street ke mega palan ke dipilih endur apai indai begigaka perengka sekula anak.
Nora Aris, ari Kpg Bako ke bisi empat iku anak besekula madahka diri bebelika barang sekula beberapa hari sebedau sekula dibuka.
“Semua perengka sekula anak dibeli maya nyau semak sekula deka dibuka, tambah mega laban ti gawa, baru diatu bisi awak bebelika barang tu.
“Tang rega barang tu pan tau dikumbai agi ulih dibeli, enda kelalu mar,” ku iya ti bebelika barang sekula anak iya Dayang Ainur Siti Asuha, 11 enggau Awang Zaykal, 9.
Nambahka nya, Selamah Saidi, 36, lebuh dikerandau Utusan Borneo suah meli barang maya sekula nyauka buka.
Iya ke datai ari Matang madahka diri deka agi bebeli perengka sekula anak iya di pasar mit dibandingka enggau palan bebeli barang ke besai.
Lebuh dikerandau kemari, Selamah meli barang anak iya, Mohd Dainel, 12, enggau Siti Damia, 6.
“Aku suah meli barang sekula anak maya nyau deka abis kemisi sekula, tang penanggul iya tusah deka ngiga saiz gari sekula.
“Aku mega deka agi milih India Street dibandingka enggau palan bebeli barang ke besai, laban kira rega ditu murah agi.
“Taja pia ba asai aku enti dibandingka enggau taun nyin kemari, taun tu mar agi rega barang,” ku iya.
Bebida enggau Normala Drahman, 37, ari Bandar Baru Samariang, iya madahka diri bebeli barang nitihka belanja ke udah ditetapka.
Iya ke bisi dua iku anak besekula mega madahka diri bebelika barang maya iya melabaka orang nadai mayuh ngagai palan ke deka dituju iya.
“Ninting taun endang bebeli barang sekula sereta nitihka belanja ditetapka, enti barang tauka gari sekula ke lama agi ulih dikena dia bala anak aku ngena nya dulu, enti udah jai nya baru ditukar.
“Aku empu enti deka meli barang, enti tumu iya nya tumu sekali baka maya pun kemisi sekula, lalu enti laun aku laun endar baka maya sekula nyau deka dibuka baru. Laban aku enggai kelalu besekut enggau orang,” ku iya ti enda madahka belanja ke udah ditetapka iya.
Kelimpah ari nya, Sulan Badun, 59, iya nya ini ngagai enam iku uchu sama enggau bebelika barang sekula bala uchu iya.
Lebuh dikerandau, iya madahka sida deka agi maya nyau pengujung kemisi bebeli barang laban maya nya udah majak kurang agi orang bebeli barang sekula nya.
“Kami meli barang tu mimit dulu, pun kemisi kami meli mimit lalu maya nyau deka masuk sekula tu kami meli mimit,” ku iya.