Pemutus Kort Federal deka dikerandau enggau ketuai bansa Dayak

KUCHING: Kepala Menteri Datuk Patinggi Tan Sri Adenan Satem deka betemu lalu berandau enggau bala ketuai raban bansa Dayak pengudah kemisi Taun Baru 2017.

Tuju nya bekaul enggau pemutus Kort Federal ba sentang Pemakai Menua enggau Pulau Galau apin lama ke udah ba kes Tuai Rumah Sandah Tabau ari Rumah Sandau, Ulu Machan, Kanowit sereta lapan iku pengempu tanah NCR ti madahka diri bisi hak ba atas 2,712 hektar pemakai menua.

Taja pia, penerang ti dipan- sutka Opis Kepala Menteri ensanus nadai madahka haribulan ke tetap.

Kort Federal kena 20 Disember tu tadi udah ngaga pemutus ke alai pemakai menua enggau pulau galau nya sebengkah ari adat enggau pengawa ti dikemeranka, tang enda dibungkur dalam undang-undang.

Pemutus nya diputuska tiga iku akim, betuaika Presiden Kort Apil Tan Sri Md Raus Shariff, Akim Kort Federal Tan Sri Ahmad Maarop enggau Tan Sri Ahmad Abu Samah Nordin. Siku agi Akim Kort Federal Tan Sri Zainun enda sepenemu enggau sida tiga nya.

Pemutus lalu ningkilka pemutus Kort Apil enggau Kort Tinggi ke sebedau tu ngaku Pemakai Menua enggau Pulau Galau nyadi sebagi ari tanah Hak Adat Bumiputera (NCR).

Pemutus nya nerima mayuh macham respon ari mensia mayuh kelebih agi Dayak.

Berebak enggau nya, Menteri Perengka Guna Mensia Datuk Dr Stephen Rundi Utom madah, nya siku ari ketuai Dayak, iya agi nganti jaku lalau ari Kepala Menteri taja pan haribulan deka betemu nya bedau ditetapka.

“Kitai nganti jaku lalau ari Kepala Menteri enggau penemu iya sentang pekara nya lalu deka berundingka chara ti pemadu manah dikena mutarka penanggul nya,” ku iya.