Raban nembiak dipinta ngaul diri ba pengawa ti manah ke pengerai
BINTULU: Raban nembiak patut diterenak rinduka pengawa ungkup pengerai sida, sekeda ari nya ba lumba enggau main baka bemain bol dikena ngelimpangka sida ari ngereja ulah ti enda menuku.
Kaban Kunsil Nengeri ( ADUN) Samalaju, Majang Renggi madah, sekalika lumba main bol, futsal sereta lumba ke bukai, ukai semina ulih ngisi maya lepa tang mega ulih nagang ari ngereja ulah enda menuku, sereta ulih ngadaka raban komuniti bepengerai.
Kelimpah ari nya ku iya, pengawa ngaul diri dalam lumba main bol ke bansa nya mega ulih ngenegapka agi pemanah kaul, narit pengerindu komuniti pupu bansa sereta nyaup ngemansangka lumba nya.
“Penanggul rama tau ngasuh pengawa pemansang menua tejanggal, nya alai lumba sekeda ari chara dikena mutarka iya,” ku iya lebuh be- jaku ba program nutup Pekit Main Bol Piala Belia Sarawak 2016 ba Stadium Mini Bintulu bedau lama ti udah.
Ku iya, lumba main bol seiti ari insiatif ke tau nagang raban nembiak ari tepawah ngereja pengawa enda menuku.
Taja pia, Majang ngelalau tuju pemansang main bol ba sekeda endur diberi pemerat dikena ngangkat tikas pemanah tim.
“Pemerat ngagai tikas disiplin, gaya, tikas pemanah gempung ke tegap dalam ngintu pengawa tim deka ulih nempa pemain bol ti manah, dikearap Sarawak ulih nempa pemain ngarika nengeri enggau menua dudi hari,” ku iya nerang.
Ku iya, pekit ke bansa tu nyadi peransang ke patut terus dipejalai kena nempa raban nembiak bepenau dalam lumba nya.
Berebak enggau nya, Presiden Serakup Main Bol Bintulu (BiFA) ke lalu nyadi Chairman Komiti Pengatur madah, pengawa ngatur pekit tu di dikena ngadaka mayuh agi pemain ari raban nembiak bepenau ngisi palan pemain renggat nengeri ke agi puang nyengkaum tim Piala Presiden Sarawak.
“Pekit tu deka terus diatur dudi hari dikena mantu pengawa tu,” ku iya.