Mensia mayuh udah meri kerejasama ti manah rambau operasyen SRB

SIBU: Raban operator bot enggau orang tambang udah meri kerejasama ke manah rambau operasyen enam hari Kaunsil Sungai- Sungai Sarawak (SRB) ba bagi menua Sibu, ke udah tembu kena 24 Disember, alai nadai sebarang penusah nyadi maya kemisi musim pengerami.

Nitih ku Penulung Kontroler SRB (bahagian II) Christopher Chan, nadai sebarang kes kelalu sarat, seraya nambah dua agi servis pejalai ngagai menua ulu sungai ke udah dikemendar dikena nangkup peminta mensia mayuh pulai ke menua.

Pejalai tu iya nya ari Sibu ngagai Kapit, ku iya nambah.

“Raban operator bot enggau orang tambang pulai mansang nengah kededua palan penyangkai orang tambang kami ba Sibu enggau Kapit udah meri kerejasama ke chukup manah sereta meretika pinta polisi kami ‘ No Ticket, No Entry’.

“Raban orang tambang mega meri kerejasama ngerikod sekeda penerang sida dulu sebedau nepan bot ekspres sereta nentuka pengelikun maya meleka/bekejang enggau sangkai,” ku Chan madah ngagai The Borneo Post apin lama.

Dikena nentuka pengelikun ke bukai bisi dipejalai nyengkaum meresa sebedau bekejang, meresa jaket pengelikun maya dalam bot, sekalika iya diengkah ba atas pala tauka ba baruh bangku orang tambang, ku iya.

Kelimpah ari nentuka pengelikun ba palan penyangkai enggau jelatung, pengawa ngempang sungai mega bisi dipasang ba palan strategik.

Ngelansa pasal penyampau tubuh orang tambang, ku Chan, dalam kandang 19 ngagai 24 Disember, bisi 15,246 iku orang tambah udah nengah Palan Penyangkai Bot Ekspres Sibu. Jelatung RC ba sepemajai Jalai Khoo Peng Loong, urung sebatu penyauh ari palan penyangkai nya, udah ngatur 3,815 iku orang tambang rambau nya.

Ba lansa ke bukai, renggat kedua operasyen deka berengkah diatur ari 31 Disember 2016 nyentuk 2 Januari 2017, alai mensia mayuh deka mulaika diri ngagai endur gawa sereta ungkup bala anak ti deka berengkah besekula baru.