Peranak menua pesisir dilalau seruran meri kerejasama ngagai perintah
SRI AMAN: Komuniti ba kandang menua pesisir di nengeri tu dilalau ngambi seruran meri kerejasama ti rat sereta tegut ngagai perintah kena ngemudahka perintah meri bemacham projek pemansang ungkup pemaik semua.
Sapit Menteri Dalam Menua II Masir Kujat madah, nyema nadai kerejasama ari rayat, perintah deka napi penusah bejalai sereta meri pemansang ke mega lalu ngerugi ukai semina perintah aja, tang mega rayat.
Nyadi piak ti bejalaika pengawa, perintah minta semua peranak kelebih agi di kandang menua pesisir meri sukung kena terus ngadaka pemansang ba sekeda kandang menua,” ku iya.
Masir ke mega Kaban Parlimen (MP) Sri Aman madah munyi nya lebuh ti bejadika Pengerami Pemesai Begulai Enggau Rayat ke diatur Komiti Pemansang enggau Pengelikun Genturung Pendiau (JKKK) Rumah Santok Empaling Asal, Pantu ba ditu bedau lama.
Ku iya, perintah endang ngemeratka pemansang ngagai rayat enda ngira sida diau di mengeri tauka menua pesisir ngambika semua renggat komuniti ulih ngasaika asil kenyau ari kuasa merintah kediri enggau bela.
Perintah endang enda ninggalka sekeda kandang menua di nengeri tu pia mega rayat enda ngira bansa, jalai pengarap lalu dini pan sida diau ngambi sama ngasai pemansang ke deka, benung sereta udah dipejalai ungkup pemaik semua,” ku iya nambah.
Ku iya nerang, sukung ti tegap ngagai tetiap pengari rayat ba kandang menua diri empu endang patut laban tu deka ngemudahka pejalai pemansang di kandang menua nya pia mega deka ngangkatka tikas ekonomi ba menua nya.
Masir madah rayat ba kandang menua pesisir patut ngubah runding, laban mayuh ari sida agi berunding chara lama ke lalu nekul sida ari berubah dikena ngangkatka tikas pengidup enggau ekonomi sida.
Gaya pengidup diatu endang bisi bida enggau kelia, berindik ari nya deka tauka enda kitai patut berubah seriris enggau arus pemansang ngambika kitai sama bela enggau rayat ke udah dulu nyapai pemansang,” ku iya nyemetak seraya nambah semua nya ungkup pengelantang ruang bilik sereta diri empu.
Sama bisi datai ba pengerami nya, ketuai opis perintah sereta tuai raban bansa ke bukai.