Pemidang KM balat diasaika rayat ba sitak Meradong
SIBU: Pengelebang niang Kepala Menteri Datuk Patinggi Tan Sri Adenan Satem balat diasaika rayat ba Kunsil Nengeri (DUN) Meradong bepun ari niang mujur mai DUN tu dipegai baru Barisan Nasional (BN) sepengudah tiga penggal ngasaika pegai parti penyakal.
Chairman Gerempung Tuai Rumah (PTR) Pampang Meradong Tuai Rumah Rantie Ayai madah, pekara tu nejuka semua rayat ba DUN tu berasai sinu laban enti ukai niang rayat ditu nyangka mengkang dipegai penyakal.
“Kami ditu agi belala amat dipegai niang laban kami nemu bakani tikas pengawa iya megai rayat.
“Seiti ari ke nyengala dipeda iya nya, udah iya nyadi chairman BN nengeri tauka Kepala Menteri, BN ditu mujur ngambi penuduk DUN Meradong ari penyakal ti endang dianti rayat ditu kenyau ari 15 taun ke udah.
“Nya alai, kitai ukai semina sinu tang rayat ditu chukup berasai berutang amat ngagai niang,” pia ku iya maya berandau enggau pengarang berita, kemari.
Niang Adenan, 73, diripotka midang pukul 1.20 lemai kemari ba Institut Jantung Negara di Kota Samarahan.
Nambahka jaku iya, Rantie mega madah, sida di Bintangor nyangka baka rayat ba sitak bukai bela agi belala dipegai niang.
Ku iya, kelimpah seiku pemesai ti kemerah, niang endang dikelala chukup berani mantaika peminta enggau hak rayat nengeri tu ngagai perintah besai.
“Niang mega endang chakah deka meda menua pesisir lebih agi baka rumah panjai bela mansang baka di mengeri.
“Enda semina nya, niang bela dipebasaka semua orang nyengkaum parti penyakal bepun ari ulah iya ti enda bechiping megai rayat pupu bansa nengeri tu,” ku iya madah baru.
Baka isu Pulau Galau ( PG), Pemakai Menua (PM), ku Rantie, semua bansa Dayak agi bela nganti niang ngemujurka aum begulai enggau tuai raban bansa Dayak ngiga jalai mutarka isu nya.
Iya madah, bansa Dayak berasai lebu amat laban niang dulu agi nadai sebedau jaku pemutus ba isu nya ulih dibantai.
“Kitai andal amat isu tu ulih diputar laban kitai pechaya niang bisi pengelandik ngiga chara bakani ngempung penemu ti deka mai pemutus ke manah ba dua bengkah isu tu.
“Tang sayau amat niang dulu agi nadai,” pia ku iya ngena jaku sinu.
Agi nandu jaku iya baru, Rantie sekali agi meri jaku puji ngagai niang ti udah mujur mantaika diri nyadi seiku pemesai tauka Kepala Menteri ti chakah bejalaika tanggungpengawa ngagai rayat enggau nengeri tu.
Berebak enggau tu mega, iya ngarika gerempung sida meri jaku sinu ngagai niang sebilik lalu ngarapka ulih besabar napi penusah nya.
Niang Adenan ti mega suah agi dikangau Tok Nan ada kena 27 Januari 1944 di Kuching. Niang ngelengka ke seiku balu enggau lima iku anak.
Niang, KM nengeri Sarawak kelima kala nyadi Menteri Betanam Betupi enggau Industri Pemakai Nengeri Sarawak enggau Menteri Pengeraja Asal enggau Rampa Menua.
Nambahka nya niang mega kala nyadi pengarang berita, pengajar, majistret enggau penyanding penemu undangundang sebedau betanding ba pengawa bepilih nengeri ba DUN Muara Tuang taun 1979.
Taja baru nyadi KM belabuh 28 Januari 2014, niang dikelala mayuh ketegal ti berani negika hak rayat nengeri tu.
Sepengudah berita pemidang niang tu ditemu, laman rama ‘ Facebook’ richah alai mensia mayuh bela mantaika jaku penyinu sereta tekenyit ati laban ti agi belala dipegai niang nyadi Kepala Menteri nengeri tu.