Pengeransing nyapai juluk ati kunchi nyadi orang ti nyulut: Dennis

LONG PELUTAN: Nadai jalai muntang dikena nyapai pemujur dalam pelajar kelimpah ari orang nya empu ransing deka nyapai juluk nyadi seiku orang ti nyulut.

Kaban Kunsil Nengeri (ADUN) Telang Usan, Dennis Ngau madah nyema seiku nembiak sekula bisi ati deka mujur dalam pelajar, sida meseti bagas belajar ninting ari.

“Semina sida ti endang bagas sereta bebendar deka mujur dalam pelajar sereta nyema pekara tu nyadi, endang patut sida ulih ngubah pengidup ke diatu menyana agi,” ku iya lebuh Pekit Main Bol Krismas diatur Raban Nembiak Daleh Long Pelutan.

Ku Dennis, bala nembiak patut nemu awak ke bisi dikena nambahka penyulut dalam diri sida sereta anang ngemeranka ulah semina nganti enggau meda aja.

“Pekara pemadu beguna iya nya sida patut milih tauka ngaga pemutus ke betul ngulihka pemujur laban iya enda datai pia aja nyema nadai ngereja sebarang pengawa,” ku iya nerang.

Iya madah, bala nembiak patut ngembuan peransang ke tinggi ngambika sida enda tepawah ari pelasar nyapai pemujur dalam pelajar enggau pengidup.

Bala nembiak di kandang menua pesisir ku iya ulih belajar enggau likun sereta lantang laban nadai dikeruga kelebih agi ba pekara main video enggau internet (media rama).

“Pekara ke bansa tu ti ngeruga pelajar kelebih agi di mengeri lalu bala nembiak di menua pesisir agi ulih meri perati dalam pelajar enggau nadai dikeruga ari pekara tu,” ku iya.

Sama bisi datai Tuai Genturung Pendiau Daleh Long Pelutan, Tinggang Pahang.

Ngelansa silik pasal pekit nya, Dennis madah tu ulih meransang pengidup ti bepengerai dalam pengawa lumba sereta runding besemekih entara bala pesereta.

“Kelimpah ari meri perati dalam pelajar, pengawa lumba mega enda patut diteju pia aja laban tu ulih ngasuh tubuh seruran bepengerai sereta nyeliahka penyakit nyema sida regas,” ku iya.