Institusyen jalai pengarap enda patut dichukai
KUCHING: Polis Padawan deka terus ngenegapka chara Omnipresence tauka nambahka penyuah raban nya kelebih agi ba kandang menua ke dikelala nyadi ‘ lokasi panas’ dikena ngurangka penyampau pengawa jai.
Nitih ku Ketuai Polis Pelilih Menua (KPD) Padawan Superintendan Aidil Bolhassan, bepelasarka statistik kandang Batu Kawah enggau Batu Tujuh mayuh nyaup indeks pengawa jai niki kelebih agi kes nyerungkai rumah enggau kes enchuri mutosikal enggau kerita.
Ku iya, chara nya dipelabaka ulih ngenegap sereta ngemanahka anggap raban bansa ngagai tikas pengelikun ke dipejalaika raban pengelikun.
“Kelimpah ari URB (Unit Ronda Bermotosikal) enggau MPV (Unit Kereta Peronda), program Omnipresence tu mega dipasuk pemesai kanan enggau Amanita, dikena ngayanka ngagai mensia mayuh polis seruran matau ba endur ke suah nyadi pengawa jai nya.
“Kandang menua Padawan bisi dua endur ke suah nyadi pengawa jai iya nya ari baruh jaga Balai Polis Kota Sentosa iya nya Batu Tujuh enggau ari baruh Balai Polis Batu Kawah, kandang endur MJC, Taman Malihah enggau Desa Wira,” ku iya.
Iya mansutka pekata nya lebuh dikerandau raban pengarang berita ba program’ kepolisan komuniti’ IPD Padawan di Pasar Sungai Maong ditu, kemari.
Aidil madahka, aktiviti matau nya deka diterus dipejalaika nyentuk ke indeks pengawa jai nya nurun lalu nyadi nyata di IPD Padawan.
Nitih ku iya, IPD Padawan taun nyin kemari mujur ngerikod penyampau pengawa jai ti bisi nurun iya nya sepenyampau -7 peratus lebuh ngerikod 900 kes dibandingka enggau 907 kes ba taun 2015.
Ku iya, pengawa jai bekaul pengasar dipeda nyata endar nurun ba taun 2016 tang pengawa enchuri kerita bisi ngayanka penambah iya nya urung 30 peratus.
Taun nyin kemari ku iya, Polis Padawan udah ngatur 29 pengawa ngabas ngenyit sereta nangkap judi mesin ikan ba kandang endur nya.
“Kitai deka seruran matau. Naka ke diatu, judi ti nadai pemendar nya agi ulih dijaga tang kami agi matau sereta nempa kerejasama enggau MPP (Majlis Perbandaran Padawan),” ku iya.
Program Omnipresence endsanus diketuaika Aidil empu, lalu sama disereta seraban 25 iku nyengkaum pemesai ti ngena 12 buah mutosikal enggau tiga buah kereta peronda.
Pengudah ba Pasar Sungai Apong, raban nya bejalaika pengawa matau ba kandang endur Batu Kawah sebedau program ke sebaka tembu di Telaga Air.
“Aktiviti ti baka tu deka dipajakka kami bemingguminggu nyentuk ke kitai ulih meda naka penyauh indeks pengawa jai nurun ba kandang IPD Padawan,” ku iya. KUCHING: Institusyen jalai pengarap enda patut dipinta dichukai, laban asil ke diulih nya ukai ke penguntung sida empu, tang dikena ngaga aktiviti ba palan jalai pengarap nya,pia ku Sapit Kepala Menteri Tan Sri Datuk Amar James Jemut Masing.
Ku iya, Chukai digaga laban kena nyukai orang tauka kompeni ke ngulih asil ti dikena sida empu.
“Ke palan pengarap, sesapa ti nyuaka pemeri tauka duit bantu dikena ngatur pengawa ba institusyen jalai pengarap sereta ngerembaika jalai pengarap nya, enda patut dichukai.
“Tang enti orang nya ngeletakka duit iya dikena ngemansangka pengawa ba jalai pengarap ketegal deka bulih penguntung enggau pemisi kediri empu, nya baru patut dichukai, ” ku iya.
“Nya alai, aku enda setuju enti Opis Chukai deka nyukai palan jalai pengarap ke ng cembuan pemisi dikena bejalaika pengawa pengarap sida...Sigi enda patut dichukai,” ku iya seraya madahka diri bedau nemu enggau silik agi pasal Ubah Ukum Akta Cukai Pendapatan 1967.
Masing madah munyi nya lebuh dikerandau pengudah nyuaka wang turu MRP (Projek Mit Menua Pesisir) ngagai gerempung ke bedau nerima dalam taun 2016, iya nya urung 22 buah NGO, Institusyen Jalai Pengarap, Sekula, Komiti Lumba enggau Main ari pupu raban bansa sereta JKKK Rumah Panjai ke mungkur urung RM320,000 ensanus.
Wang turu MRP ari perintah nya ungkup ke penudi endar ke taun 2016 ti diberi ngagai opis menteri nya bisi RM2.4 juta, lalu tebal ari penyampau nya udah disadung ngagai penerima di Kapit dalam kandang berapa minggu tu ke udah.
Masing ti mega Menteri Pemansang Infrastruktur enggau Perengka Pengangkut madah baru, iya lalu bedau nemu perambu opis chukai, tang enti ketegal dikena bejalaika aktiviti ba institusyen jalai pengarap, nya endang enda patut dichukai.
“Enti sema baka gerija ngena duit nya dikena be- ranakka puku ketegal tuju ke batang deka dikena bejalaika pengawa jalai pengarap, nya enda patut dichukai. Tang enti, penguntung nya dikena kediri empu (nadai kaul enggau palan pengarap) sigi salah, lalu patut dichukai,” ku iya.
Bekaul enggau duit MRP ke diterima penerima nya ensanus, Masing ngarapka ungkup nya dikena enggau memanah.
“Enti sema geran nya diberi ngagai institusyen pengarap, kena mih bejalaika pengawa pengarap, lalu enti dikena meri palan Lumba enggau Main, latih mih bala nembiak kitai ngambika nyulut agi, lalu enti ungkup JKKK, kena mih ungkupnya enggau manah.
“Aku ngarapka Taun 2017 tu, taja pan mayuh agi pemar, tang kitai ke nyadi rayat Sarawa diperansang majakka singkang kitai ke mua, taja pan kitai mayuh macham bida dalam jaku, bansa enggau pengarap, tang kitai ulih segulai, sejalai, laban nya batang tuju ke deka nempa Sarawak nyadi menua ke lantang endur diau,” ku iya.