Pemidang Adenan pengelenyau ke besai ngagai peranak menua pesisir
Pemidang KM ukai nengenyitka aku aja tang mega peranak pesisir
MIRI: Berita pemidang Kepala Menteri Datuk Patinggi Tan Sri Adenan Satem ba Palan Tungkul Ati Sepital Besai Sarawak di Samarahan urung pukul 1.20 ngalih hari kemari pengelenyau ke chukup besai ke lebih agi ngagai sida di kandang menua pesisir.
Kaban Kunsil Nengeri (ADUN) Telang Usan, Dennis Ngau lebuh dikerandau kemari madahka pemidang Adenan ukai semina ngasuh iya tekenyit aja tang mega peranak ba sitak iya.
“Adenan chukup dikesayau sereta dipebasa komuniti ke lebih agi ba kandang menua pesisir. Rambau penggal iya, iya udah bebendar ngemeratka mayuh agi pemansang di menua pesisir ti ngujungka mayuh projek pemansang dipejalai ba sitak aku,” ku iya.
Adenan chukup dikesayau sereta dipebasa komuniti ke lebih agi ba kandang menua pesisir. Rambau penggal iya, iya udah bebendar ngemeratka mayuh agi pemansang di menua pesisir ti ngujungka mayuh projek pemansang dipejalai ba sitak aku. Dennis Ngau Kaban Kunsil Nengeri Telang Usan
Dennis ke dalam pejalai iya mulaika diri ke Miri ari Long Lama lebuhka dikerandau madahka pemidang Adenan pengelenyau ke chukup besai ngagai komuniti Orang Ulu ke nganti iya meri pemansang.
Iya madahka Adenan udah ngamatka projek besai di Telang Usan iya nya jematan Long Lama ke beungkus manggai RM70 juta.
“Tu projek pemadu besai diberi ngagai Telang Usan lalu kami chukup beterima kasih sereta bebasaka Adenan ke udah ngemendarka projek tu,” ku iya.
Bekunsika penemu ke sebaka enggau Dennis, ADUN Marudi ke mega Menteri Muda Kunsil Kandang Menua, Datu Dr. Penguang Manggil ti ngaku pemidang Adenan penyelenyau ke chukup besai.
“Kitai lenyau seiku lelaki ti udah ngereja mayuh pengawa dalam timpuh ke chukup pandak, ke lebih agi ngagai komuniti Iban sereta ngagai Sarawak sereta enda mudah leju negika hak rayat Sarawak,” ku iya.
Iya mega madahka pemidang Adenan mega pengelenyau ke besai ngagai sitak iya ba polisi pemansang menua pesisir enggau pemerat iya ngagai pengidup komuniti menua pesisir.