Kerejasama enggau integriti tinggi raban soldadu patut nyadika teladan: Mundaw
KOTA SAMARAHAN: Kerejasama enggau integriti tinggi ti dikemeratka dalam raban soldadu patut dikemeran sereta diteladan pengereja pengawa opis perintah menua tu.
Panglima 1 Divisyen Infantri Malaysia, Mejar Jeneral Datuk Stephen Mundaw madah, kerejasama enggau intigriti tinggi nya entara ti pemadu beguna sereta dikemeratka dalam Program Modul Pertahanan, Diploma Pentadbiran Awam, Institut Tadbiran awam Negara (INTAN) ngagai orang ke baru deka nyadi Pegawai Tadbir enggau diplomatik (PTD).
Objektif ke ditetapka dalam kus tu dikena ngiri penemu tauka penerang pasal pengawa soldadu ngetanka pengelikun menua ari sukut operasyen enggau chara ke engkeman, ku iya.
‘Bisi dua pekara ti dipelajarka dalam kus tu, keterubah iya nya chara raban soldadu ngaga pengawa ti ngemeratka kerejasama. Laban enti nadai kerejasama deka bisi penanggul lebuh ngereja pengawa.
“Kedua, lebih ngagai integriti. Nama aja pengawa ke dikereja kitai enda tau enda dipejalaika enggau penuh integriti. Enti diberi pengawa, kereja mih enggau pengabis manah.
“Kitai ngarapka objektif kus ke diatur tu ulih dijapai,” ku iya lebuh ke bejaku maya bejadika Perbarisan Kursus Diploma Pengurusan Awam, Institut Tadbir Negara (INTAN) bakal Pegawai Tadbir dan Diplomatik siri 3/2016 ke diatur ba X-Ray Camp, Sur- vival Village 10RRD, Kem Muara Tuang ditu, kemari.
Nambahka nya, lebuh dikerandau raban pengarang berita pengudah bejadika Perbarisan Kursus nya, Stephen madahka kus nya mega bekunsika strategi operasyen enggau teknikal bekaul enggau soldadu ti nyaga menua.
“Pesereta kus tu diau urung dua minggu ditu (ba kem). Kus tu meri penemu pasal pengawa ngetanka menua ngambika sida ulih meretika semua konsep pengawa ngetanka menua ti dipejalaika soldadu.
“Kitai ngarap sereta majakka momentum ke udah dipejalaika ba siri 1 enggau 2 ke sebedau tu lalu ngarapka jauh manah agi,” ku iya.
Siri 3/2016 program tauka kus nya dipasuk 61 iku pesereta ke deka dipilih nyadi Pegawai Tadbir dan Diplo- matik.
Latih nya berengkah diatur ari 9 ngagai 20 Januari, ba Survival Village, 10RRD, Kem Muara Tuang.
Sama bisi datai kemari, Brigedier Jeneral Mohd Bustaman Mat Zin, Panglima 3 Briged.