498 iku raban 31 Briged Garis Entara Menua udah mujur nembuka latih
KOTA SAMARAHAN: Urung 498 iku orang ke dipilih sereta dilatih nyadi raban 31 Briged Garis Entara Menua ari baruh Pemerintahan 1 Divisyen, udah tembu dilatih sereta deka dianjung nyaga pengelikun ba garis entara menua di menua tu.
Panglima 1 Divisyen Infantri Malaysia, Mejar Jeneral Datuk Stephen Mundaw madah, atur milih sereta ngelatih raban soldadu nya deka dipajak nyentuk taun 2018, ti udah berengkah kenyau ari taun nyin kemari.
“Kitai dalam proses ngemansangka 31 Briged lalu apin lama kitai bisi 498 iku rekrut ti udah tembu dilatih ke alai sida nya dianjung gawa ba Batalion Rejimen Entara Menua ke bisi.
“Diatu dalam benung dalam proses nambahka eset enggau ngiga alai dini endur sida (498 iku) dianjung gawa. Tu benung dipejalaika, ti ke bendar berengkah taun nyin kemari sereta deka dipajakka ngagai taun 2018, nyentuk lima Batalion penuh.
“Sida nya bejalaika tanggungpengawa nyadi Rejimen geris entara menua ti nyaga pengelikun, berati enggau nyaga garis natara menua kitai enggau Indonesia,” ku iya.
Stephen mansutka pekara nya lebuh dikerandau raban pengarang berita, pengudah tembu bejadika Perbarisan Kus Diploma Pengurusan Awam, Institut Tadbir Negara, ke deka nyadi Pegawai Tadbir & Diplomatik Siri 3/2016 ba X-Ray Camp, Survival Village 10 RRD, Kem Muara Tuang ditu, kemari.
Kelimpah ari nya, Stephen madahka kerejasama sereta kaul rat entara raban soldadu darat kededua menua Malaysia enggau Indonesia, ngenegapka pengelantang enggau pengelikun ba garis antara menua Malaysia-Indonesia di Sarawak.
Pekara nya dipadahka ngagai pengarang berita lebuh ditanya pasal pengelikun enggau pengelantang garis antara menua kededua buah menua.
“Tikas pengelikun enggau pengelantang ba garis antara menua (enggau Indonesia) chukup manah, nadai isu.
“Ke bendar kitai nempa kerejasama enggau bala bakih soldadu ba sepiak nyin (Indonesia). Bisi ba sekeda garis entara menua nya kami begulai sereta bekerejsama, ngaga patrol enggau ke bukai.
“Aku mega nempa kaul enggau penyambung ti manah enggau raban soldadu sepiak nyin. Panglima 3 Briged mega suah bekangau enggau ketuai sepiak nyin ( Indonesia),” ku iya.