PWPK patut ngemayuh pemansut penatai pemisi
Dikena nyungkak penatai pemisi pekebun mit lalu nyapai juluk Malaysia nyadi menua mansang
SARATOK: Raban Indu Pekebun Mit (PWPK) patut landik ngemayuhka pengawa ekonomi kena mantu nyungkak penatai pemisi ruang bilik raban pekebun mit.
Kaban Kunsil Nengeri ( ADUN) Kalaka, Datuk Abdul Wahab Aziz madah, perkara tu patut diperati berindik ari Malaysia diatu benung nuju nyapai status menua mansang.
“Dalam pengawa meri sukung ngagai juluk nya, piak Opis Pemansang Orang Betanam Getah Kebun Mit (RISDA) udah numbuhka PWPK dikena nyukung agenda menua ti deka ngemansangka raban orang indu ti ngembuan pangku pengawa nyadi palan tauka raban ti ngiring komuniti pekebun mit.
“Nya alai, kitai ngarapka pekebun mit indu ulih begulai enggau RISDA sereta perintah bejalaika pengawa pemansang laban indu nyadi sebagi ari pemansut ekonomi di menua tu,” ku iya.
Iya mansutka jaku nya rambau Program Pemesai Begulai Enggau Rayat sereta Program Bejadi Woksyop PWPK Cahaya RISDA enggau Program Siruka Pekebun Mit bepalan ba Kampung Tanjung, semak ditu, lemai kemari.
Ku Wahab, bala kaban PWPK mega patut ngenegapka agi ruang bilik enggau komuniti berindik ari pengelekai penanggul rama nyengkaum ba kandang menua pesisir kemaya hari tu.
Tandu iya, bala sida bejalaika pengawa ti beguna endar nempa enggau nyeridi bala anak, lalu tu ulih nagang penanggul rama terus nyadi ba ruang bilik raban pekebun mit.
Ba lansa ke bukai dalam jaku pengelalu iya, Sapit Direktor RISDA Nengeri Sarawak, Abdul Aziz Awang madah, nyentuk diatu sepenyampau 60,000 iku pekebun mit getah berejista ari baruh RISDA di nengeri Sarawak iya nya ari sida ke indu.
Bepelasarka penerang nya ku iya, dalam ngenegapka raban tu piak RISDA udah nyedia bemacham pelin enggau langkar dikena nyungkak penatai pemisi raban tu ngagai tikas ke manah agi nengah mayuh macham chara.
“Diatu pengawa dikena nyapai juluk nya udah dipejalai nengah penumbuh 15 bengkah PWPK enggau lebih 305 iku kaban di serata bagi menua.
“PWPK udah ditumbuhka kena ngenang pemanah pengawa pekebun mit indu dalam nyungkak tikas ekonomi rama enggau nagit penatai pemisi ruang bilik nambah manggai RM4,000 sebulan datai ba taun 2020.
“Kitai deka meri penyedar ngagai bala komuniti alai raban indu bisi pangku pengawa beguna endar nentuka pemansang menua, tang lebuh nyebut pasal pekebun mit suah agi bala komuniti ngaitka raban tu nadai ngembuan penemu ke mayuh kelimpah ari pengawa digaga sida aja.
“Nya alai, RISDA bejalaika pengawa ngenegapka pekebun mit indu enggau nyediaka latih sereta iring dalam pekara ti bekait enggau pengawa ngatur ruang bilik, pengawa dagang, pengawa ngatur produk sereta pekara wang,” ku iya.
Berebak enggau nya mega, Abdul Aziz ngelalau pekebun mit indu begulai enggau RISDA sereta perintah gawa ungkup pemansang menua laban indu nyadi sebagai ari penyungkak ekonomi menua.
“Nyerumba ubah teknologi enggau peminta ke tinggi kemaya hari, raban indu patut berani agi ngerebut awak ke bisi kena nentuka penatai pemisi ruang bilik tegap agi sereta tejamin,” ku Abdul Aziz nerang.
Ku iya, PWPK empu ditumbuhka RISDA dikena ngemansangka pekebun mit ke tebal agi ngaul diri dalam dagang industri mit enggau jelan pemesai (IKS) kelebih agi di menua pesisir.
Ungkup sitak DUN Kalaka, bisi lapan iku pesereta diberi bantu lalu sida tu chakah gawa. Abdul Aziz minta chairman sereta komiti PWPK chakah agi bejalaika pengawa enggau aktiviti kediri empu.
“Tuju penumbuh PWPK tu empu iya nya nempa orang dagang nyulut kelebih agi bini tauka raban nembiak indu pekebun mit kelimpah nambahka penatai pemisi ruang bilik pekebun mit ngagai RM4,000 sebulan datai ba taun 2020,” tandu iya.
Beserimbai enggau program nya, Abdul Wahab bisi nyuaka replika chek agih belanja penyampau RM5,000 ngagai woksyop PWPK Cahaya RISDA.
Sama bisi datai Ketuai Unit Pengerembai RISDA Sarawak Izzaidah Sini enggau Pemesai RISDA Betong, Mohamad Zainal Lihim.
Dalam pengawa meri sukung ngagai juluk nya, piak Opis Pemansang Orang Betanam Getah Kebun Mit (RISDA) udah numbuhka PWPK dikena nyukung agenda menua ti deka ngemansangka raban orang indu ti ngembuan pangku pengawa nyadi palan tauka raban ti ngiring komuniti pekebun mit. Datuk Abdul Wahab Aziz ADUN Kalaka