Anak bansa Penan tetap deka diambi gawa: Liwan
KUCHING: Bala anak bansa Penan kelebih agi ba kandang menua Belaga dijamin deka diambi bekereja enggau Sarawak Energy Berhad (SEB) sereta kompeni bukai pengudah nembuka pelajar ba tikas latih enggau teknikal nitihka bidang sida empu.
Menteri Muda Perengka Pengangkut Sungai enggau Pengelikun ke lalu mega Kaban Kunsil Nengeri ( ADUN) Belaga, Liwan Lagang chukup andal ba pekara nya madah, tu sebagi ari tanggungpengawa kompeni bekaul kelebih agi dalam pemansang Tekat Ai Hidro Elektrik (HEP) Murum ti mulaika baru pemaik ngagai raban bansa Penan ti kena pangka pekara nya.
“Naka ke diatu, endang nadai bala anak bansa Penan kitai diterima bekereja ba SEB tauka kompeni luar bukai, laban kandang ke diatu bala anak bansa Penan agi besekula sereta bisi sekeda sida benung nampung pelajar ba kolej pengelandik, teknikal enggau latih.
“Tang aku andal sereta pechaya, pengudah bala anak tu nerima pelajar ke patut sereta mujur nembuka pelajar sida, alai sida deka diambi bekereja enggau SEB sereta kompeni ke bukai, nadai ngira bidang ngatur pengawa tauka teknikal,” ku iya.
Iya mansutka jaku tu ngagai pengarang berita pengudah bejadika Program Nyuaka Geran Pelajar Penan Dipelanja Tabung Amanah Bakun (TAB) ke diatur ba Centre of Technical Excel- lence Sarawak (CENTEXS) semak ditu, kemari.
Sepenyampau 13 iku bala anak bansa Penan dikemendarka peminta nyereta bemacham kus latih enggau teknikal ti dibuka CENTEXS ungkup sesi 2017.
Bela mantaika pengandal ke sama pengudah SEB ngambi HEP Bakun ila, ku Liwan, muka awak kereja ngagai peranak menua nya endang patut dibanding semina nejuka sida meda aja lalu nadai nyadi sebagi ari pemansang ke dibai ngagai menua sida.
“Komuniti kitai di Belaga udah mayuh ngalahka diri nyengkaum tanah, main asal enggau pengidup sida ketegal deka meri awak ngagai pemansang.
“Nya alai, peranak ba kandang menua kena pangka ngarapka kompeni ke ngemai pemansang bela mulaika baru pemaik ngagai sida baka meri kereja,” ku iya nerang.
Ngenang pasal program nya, ku Liwan, tu nyadi inisiatif TAB nengah Komiti Pelajar Komuniti Penan ke diadaka kenyau ari taun 2015 alai tuju mantu raban dituju kelebih agi ba kandang menua Belaga nerima pelajar ke menyana.
Ku iya, sida mega gagit sereta beterima kasih ke pemeri ti diberi SEB iya nya nyediaka geran sepenyampau RM200,000 setaun dikena ngemujurka sebarang program ke diperambu ungkup komuniti Penan ba sitak nya.
“Kitai enggaika bala anak bansa Penan kitai tinggal dalam pelajar. Taja seraka antara sida enggau nembiak di mengeri jauh bebida, tu ukai nyadi ke dalih kitai enda ngemeratka pemesai guna pelajar ngagai sida.
“Nya alai, enggau pemisi agih belanja ke diberi SEB, kitai deka mai bala anak bansa Penan tembu pelajar ba From 3 enggau Sijil Pelajaran Malaysia ( SPM) enggau kus sereta latih teknikal seraya meransang sida nyereta sekeda bidang ke bisi dibuka nyentuk ke sida mujur nembuka pelajar, sebedau sida diberi kereja nitihka bidang ti disereta,” ku iya nerang.
Ba pekara bekaul, Tukang Wang Tabung Ekonomi Gagasan Anak Bumiputera Sarawak (TEGAS) ke mega ADUN Balai Ringin Snowdan Lawan madah, TEGAS enda tinggal ngelakuka bidang latih enggau teknikal ngagai semua raban nembiak di Sarawak.
“TEGAS deka ngatur pejalai ngelawa semua bagi menua di Sarawak berengkah ari Kuching nyentuk ke Limbang ngelakuka bidang teknikal enggau latih ke bisi kelimpah meri awak ngagai bala nembiak menua pesisir, kelebih agi ngagai sida ke bisi ati ngerejista nama diri,” ku iya.
Sama bisi datai Ketuai Pemesai Eksekutif CENTEXS Syeed Mohd Hussien Wan Abdul Rahman, ADUN Murum Kennedy Chukpai Ugon enggau Pemantu Menijar Besai Tanggungpengawa Rama Korporat (CSR) SEB Jiwari Abdullah.