Peranak Belaga patut dikemerat diberi kereja dulu
KUCHING: Nengah pemujur Perintah Sarawak ngempu HEP Bakun ti ngeluarka kuasa 2,400 MW ari Perintah Besai, peranak menua tu patut dikemeratka dulu diberi kereja ba sebarang pengawa ngaga projek besai,pia ku Kaban Kunsil Nengeri Belaga Liwan Lagang.
“Kitai mayuh amat bala injinir ari pelilih Belaga ti nadai kereja diatu. Laban Bakun nya udah diempu perintah nengeri, kemeratka mih dulu peranak menua ditu,” ku Liwan madah ngagai The Borneo Post ditu ensanus.
Kelimpah ngemerat meri kereja ngagai peranak ti nguan menua tu, Liwan madah perintah mega patut mutarka peminta ari rayat di pulilih menua nya baka dekaka jalai ti manah agi, karan 24 jam ti disambung ari sistem grid enggau bekal ai beresi.
Rintai peminta nya udah lama dipinta rayat ari kandang endur ti bisi pangka terus tauka enda baka ba skim palan pengentap berumah baru Sg Asap enggau ke diau ba ili HEP Bakun, mega patut bela dikemeratka.
“Sida udah bebendar nyaup ba pengawa ngaga HEP Bakun.Tu mih maya Perintah Nengeri patut nyendiaka utai ke dipinta sida,” ku Liwan ke mega nyadi ketuai ba Projek Transformasyen Menua Pesisir ungkup raban ke kena pangka projek hidro elekterik di negeri tu.
Liwan mansutka jaku nya ngenang pemujur perintah negeri ngempu Bakun HEP ti dibantaika Kepala Menteri Datuk Amar Abang Johari Tun Openg kena Hari Tiga tu tadi.
Ku iya, kelimpah idup dalam penangi ke tekat ai nya runtyh, sida ke diau ba ili tekat ai nya mega ngenatka diri ari ensium bau sulfur ai jalai ai nya dililih.
“Abis nadai kitai patut mampas sida laban udah nerima pengawa ngaga projek besai nya lalu meri sida penyikap perengka guna ke patut. Ke bendar sida enda minta lebih ari nya,” ku iya.
Iya mega madahka rayat di Belaga ngelama tu udah meri sukung penuh ngagai BN, lalu nya mih kebuah sida berasai asa laban lubah nerima pemansang.
“Kami udah lama nganti digagaka jalai ti manah, ai enggau karan ungkup rayat din, ukai semina jalai ke nuju pasar Belaga ti digaga nengah projek ‘Jiwa Murni’ ke suah rusak ketegal ujan bangat,” ku iya seraya madahka ba penyadi ke pemadu baru ke alai jalai Mejawah-Belaga Road udah tusur lalu enda ulih ditengah penguna jalai nya.
Sama bela berasai asa iya nya MP Hulu Rajang Datuk Wilson Ugak Kumbong ti madahka rayat di Belaga chukup liat ati enggau perintah.
Ku iya ke nyadi MP sitak, patut mayuh agi duit diberi ngagai Belaga dikena ngeamnsangka pasar nya.
“Sebedau pemujur ngempu HEP Bakun, nengeri tu dibayar entara RM120 nyentuk 130 million ninting taun, ke mega nyadi levi ai. Laban HEP Bakun udah di empu Perintah Nengeri Sarawak nengah Energy Berhad (SEB), patut m ayuh agi duit diungkupka kena ngemansang pelilih nya nengah Tanggung pengawa Rama Korporat (CSR),”ku iya.
Ugak, ke mega kaban kaunsil Sarawak Hidro kenyau ari taun 2015 madah, iya udah mujur minta belanja CSR ari Sarawak Hidro sepenyampau RM100,000 nyentuk RM1 million ninting taun.
“Diatu tekad ai nya udah diempu perintah nengeri, aku enda nemu sekalika agi dipilih nyadi kaban kaunsil. Taja pia nyadi MP sitak nya,aku deka majak bejalaika tanggungv pengawa nyungkak pengelantang pendiau rayat di Belaga,” ku Ugak.
Iya mega ngenataika pengaga ati ngagai Kepala Menteri Datuk Amar Abang Johari Tun Openg ketegal udah mujur berandau enggau Perintah Besai lalu ngempu HEP Bakun, seraya madahka nya sebagi ari kuasa devolusyen ti dikedeka Sarawak.
Berebak enggau nya, Liwan mega minta perintah nengeri ngerembaika projek berumah ti baru dipenyadi bedau lama udah ngagai skim palan pengentap berumah baru ngagai Sg Asap seraya ngarapka ngaga rumah ke ulih dibeli berega baruh ari RM100,000.
Ku iya, rumah nya patut digaga ungkup rebak kedua sida ba palan pengentap baru Sg Asap.
Bulan siti nyin tadi, lebuh bejadi dua bengkah polisi rumah ti ulih dibeli iya nya ‘Skim Peruhaman Khas Rakyat’ (SKEKTRA) nengah bantu dua opis wang ti ditumbuhka perintah nengeri iya nya ‘Mutiara Mortgage and Finance’ di Lundu, kepala menteri mega madahka skim rumah nya patut dikerembai ke Sg Asap.