Seiku baya indu 2.17 meter mujur ditangkap ba Sungai Santubong
KUCHING: Seiku baya kira 2.17 meter pemesai kena panjuk Raban Pengasu Jelu Siga (SWAT) Opis Kampung Sarawak ( SFC) ba Sungai Santubong kemari.
Baya indu nya dipelaba makai seiti ari 16 mata ginti ke dipasang enggau umpan manuk enggau kambin sebedau ke ditan ba 16 palan ba sepanjai sungai.
SWAT SFC bejalaika operasi nyidi sereta ngasu tu pengudah seiku staf sebuah sekula sekondari ditagup baya lebuh iya nyala undang ba tebing sungai Kampung Santubong kena 8 Feb tu tadi.
Sapit Menija Besai SFC, Oswald Braken Tisen madah, taja baya nya ukai ke diselinting sida laban agi mit tang iya deka dipindahka ngagai Palan Nupi Jelu Siga Matang.
“Kandang tu (Sungai Santubong) endang zon mindahka baya lalu SWAT SFC beoperasi ditu kedua kali laban bisi kes orang menua tu ditagup baya,” ku iya lebuh dirandau ba pengkalan Opis Orang Berikan Santubong kemari.
Oswald madah, operasi ngetan umpan nya bepun Hari Satu (6 Mac) tu tadi lalu deka ditampung nyentuk sehari tu, sebedau ke tembu.
Kelimpah lima kaban SWAT SFC, operasi nya mega bela dipasuk dua raban polis, seiku RELA enggau seiku staf Opis Orang Berikan Sarawak ke dipejalaika ba sepanjai 2.5 kilometer ari palan kena tagup baya nya.
Raban operasi bisi ngengkahka papan pal madahka bisi baya ba dua bengkah endur ke semak tebing sungai Kampung Santubong nya ngambika mensia mayuh bela nemu lalu nyeliahka penusah ke sebaka nyadi baru. — Bernama