Tiga buah jematan patut digaga ke pengelantang peranak Kpg Kebuaw
MUKAH: Peranak Genturung Pendiau Kebuaw, Igan deka meda tumpuk pendiau sida disambung ngagai jalai besai ngambika entukar darat ulih dibai tama kia.
Taja pia, Kaban Kunsil Nengeri (ADUN) Jemoreng Datuk Dr. Juanda Jaya madahka, bisi tiga jematan patut digaga ngambika juluk sida tu nyadi nyata.
“Tiga jematan patut digaga ungkup pengawa nyambung Kampung Kebuaw enggau jalai besai,” ku iya madah ngagai Utusan Borneo rambau penemuai iya ngagai tumpuk pendiau nya bedau lama ke udah.
Dua ari jematan ke patut digaga ku iya semina sedepa pemanjai sereta seiti agi deka ditangkir baru.
Taja projek tu udah dikemendar ari baruh Program Transformasyen Menua Pesisir (RTP) lalu penyampau RM300,000 udah diagih, tang enda chukup kena ngaga ketetiga jematan nya.
“Kitai deka nguji berunding sereta berandau baru enggau piak bekaul ba pekara belanja ngambika jematan ulih digaga lalu nyambung Kampung Kebuaw enggau jalai besai,” ku Juanda.
Berebak enggau nya, iya mega udah bejadika Surau Al-Salam ba tumpuk pendiau nya.
Iya nangkan mensia mayuh nguna perengka guna endur besembiang nya enggau manah kelimpah endur nembiak ngiri penemu.
“Anang natak surau tu semina endur besembiang aja, iya tau mega endur ngatur program bekaul enggau penemu sereta ke bukai pulaika pemaik peranak ditu,” tandu iya.
Juanda mega bisi ngabas Chapel Saint Theresa laban ruai rumah sembiang nya bisi tuduh maya hari ujan.
“Aku bisi dipadah alai chapel tu udah manggai 25 taun lalu nadai kala diintu kenyau ari iya digaga dalam taun 1992,” ku iya sereta deka ngaga perambu ngemanah laban tu peminta peranak dia.