KSDS deka merindang ba Palan Pengeraja Asal Sibu pagila

SIBU: Beserimbai enggau Sibu Tower Run ke nyadi seiti ari program nyerumba Taun Nemuai Ke Sibu (TMS) 2017, Kelab Sape Dayak Sibu (KSDS) bisi nerima kangau khas mandangka ‘Busking’ bepalan ba Palan Pengeraja Asal Sibu, Jalai Central kena 12 March tu (pagila).

Chairman Protem KSDS Anthony Abong madah, sida deka berengkah merindang urung pukul 4 lemai nyentuk pukul 7 malam.

“KSDS dikangau ngemujurka ‘ Sibu Heritage Busking’ 2017 nyerumba Sibu Tower Run ke nyadi sebagi ari program TMS 2017.

“Program tu mega nerima sukung ari Palan Pengeraja Asal Sibu, Borneo Even Entertainment, Kaunsil Dagang Temuai Sarawak enggau Kaunsil Mengeri Besai Sibu (MPS),” ku iya, ditu kemari.

Nitih ku iya, enggau awak diberi piak pengatur KSDS deka ngena aktiviti ‘Busking’ tu ngemai kelala pemisi kelab sereta mandangka iya ngagai mensia mayuh nyengkaum sekeda gempung.

“Kitai mega ngaku aktiviti tu dikena ngerapitka agi pemanah kaul antara kaban, gempung-gempung ke bukai sereta mensia mayuh di menua nya,” ku iya seraya meri terima kasih ngagai piak pengatur ti udah ngagauka KSDS ngemujurka atur program nya.

Ba lansa ke bukai, Anthony madahka KSDS deka merindang ngena sape, antara iya ‘Lasan’, ‘Datun Julud’, ‘Leleng’, ‘Lelau’ sereta bemacham lagu nge- na muzik sape nyengkaum pemerindang solo sekeda bala kaban kelab.

Kelimpah ari nya ku iya, pekara ti narit ati deka dibantaika KSDS iya nya pemerindang sape beraban ngaum 20 iku.

“Bala sida tu deka nebah sape bebala mayuh ngasilka bemacham tiun nitihka ditebah sida empu. Tu mega tau dikumbai gempuru bebala mayuh pemain sape eri KSDS ke udah bisi pematak kediri empu sereta penyelai,” ku iya nampung.

Berindik ari nya, mensia mayuh ditesau datai bebala mayuh ngagai Palan Pengeraja Asal Sibu, Jalai Central ditu pagila ngerichahka agi atur program TMS 2017 sereta beperindang enggau bemacham bansa muzik Sape ari KSDS.