Ruang bilik ti meruan nyadi pugu pengelikun menua

SRI AMAN: Ruang bilik ti meruan nyadi pugu pengelantang enggau pengelikun menua, pia ku Penyelia Kanan, Opis Pemansang Mensia Mayuh ( KEMAS) Bagi Menua Sri Aman, Fatimah Tahir.

Berindik ari nya ku iya, pangku pengawa apai indai beguna endar ba pengawa nerenakka paung pengasih dalam ruang bilik ti meruan.

“Apai indai meseti ngena awak lepa sida begulai enggau bala anak di rumah sereta nyeridi sida nyadi mensia ti menyana ngagai menua,” ku iya lebuhka bejaku nutup Program Ruang Bilik Lantang diatur KEMAS Bagi Menua Sri Aman bepalan ba Balai Urusetia Saudara Kita (USK) Hikmah, Kampung Klassen, Sri Aman pagi kemari.

Tandu iya, nyema ruang bilik tu lantang, alai bala anak mega deka ngembuan pemanah ulah.

“Pekara tu dikena nagang bala anak ari ngereja ulah ti enda menuku baka ngaga penyalah enggau gian dadah.

“Bala anak ari ruang bilik ke meruan tentu idup lantang agi sereta ulih ngemeratka pengawa ba pelajar. Bala anak ke ada dalam ruang bilik meruan deka ngembuan runding ti likun sereta juluk ke tinggi,” tandu iya.

Nya alai ku iya, nyadi sebengkah menua ti pupu bansa, kitai patut nempa raban bansa ti bela nelap enggau pangan diri.

“Ulah tu semina ulih diadaka nengah ruang bilik ke meruan aja.

“Pia mega, nengah ruang bilik ke meruan ulih nempa raban bansa bisi penyayau, penyiru, enggau manah ulah,” tandu iya.

Sama bisi datai, Penyelia Bina Insan, KEMAS Sri Aman, Musa Haadi, Penyelia Pelajar Pengelandik (PIKEM), Rosani Ham sereta bala kaban USK Klassen ke bukai.