Ketuai komuniti ngansak perintah nengeri ngemansangka Belaga
KUCHING: Bala ketuai komuniti Belaga udah ngapil ngagai perintah nengeri enggau pelin pengawa dikena ngubah pelilih menua agi tinggal pemansang ngambika nyadi moden sereta palan ti richah enggau eko-dagang temuai.
Nguluka peminta ngambika perintah nengeri datai enggau pelin besai nya, iya nya Chairman Komiti Tindakan Bakun, Pemancha Ajang Sirek.
“Kami begunaka semua pelin besai dikena ngemansangka Belaga. Nyadi pelilih menua ti ngasil lebih ari 3,000MW kuasa elekterik, baka ari Tekad Kuasa Hidro (HEP) Bakun enggau Murum, endang patut bisi siti utai ke pemadu manah setipak enggau semua pusin ekonomi ari asil kuasa di serata nengeri,” ku Ajang madah ngagai The Borneo Post ditu kemari.
Ku iya, kuasa diasilka ari pelilih Belaga udah ulih matak bebilion ringgit ba puku diperanak menua luar di Samalaju enggau kandang Projek Koridor Kuasa Ulih Dikena Baru Sarawak (SCORE), tang pemulai dalam sukut projek pemansang ngagai pelilih menua tu chukup mimit.
“Kitai enda patut terus tinggal di belakang baka kitai tu anak iru di nengeri tu.
“Lis ba pinta kitai enda mar ditangkup seagi bisi penyiru ke bendar sereta pemerat ngagai kitai ke udah nyukung perintah,” ku Ajang nyemetak.
Bala ketuai komuniti ari bansa Kayan, Pemancha Umek Jeno ngansak perintah numbuhka Kaunsil Pelilih Belaga enggau naka penyampat laban diatu agi bepanggai ba Kaunsil Pelilih Kapit ba pekara belanja enggau perambu.
“Pekara ke diguna Belaga enggau jampat iya nya bisi kaunsil kediri empu ngambika ulih ngelangkar projek pemansang ke patut ti diguna pelilih tu,” ku iya .
Kelimpah ari nya, iya mega dekaka nama Sungai Asap diubah ngagai Apau Koyan sebaka enggau nama ke dikangau bala komuniti dia.
“Pia mega kami ngapil ngagai perintah ngangkatka Apau Koyan nyadi pelilih menua laban ukai patut agi nyadi pelilih mit,” ku iya.
Ku Umek, sekeda ari penyikap perengka guna Pasar Belaga ke agi kurang iya nya perengka guna lumba enggau main baka stadium mini, waterfront baka ke udah suah disemaya, injin api lama di pasar nya patut diketu lalu patut disambung ngagai sistem grid, Jalai Mejawah-Belaga ke diatu patut dikemanah enggau jampat dikena nyediaka penyambung ngagai menua luar.
“Kami begunaka pelin besai ke nyata dikena ngangkatka Pasar Belaga nyadi pasar baru moden sereta mega nempa pelilih menua tu richah enggau palan ti narit ati,” ku iya.
Ba Pemancha Tony Kulleh ari komuniti Kenyah, iya minta Kaban Kunsil Nengeri ( ADUN) Belaga enggau Menteri Muda Perengka Pengangkut Sungai enggau Pengelikun diangkat nyadi menteri penuh ngambika iya ulih mantu perintah ngubah Belaga nyadi pelilih menua moden.
“Kami begunaka seiku ari komuniti kami dipadu nyadi menteri penuh dalam kabinet nengeri ngambika iya ulih ngereja mayuh agi pengawa ungkup Belaga enggau komuniti Orang Ulu. Nya alai kami ngarapka peminta tu ulih diperunding,” ku iya.
Tony madah, pelilih Belaga enggau dua tekat HEP nya ulih diubah nyadi palan eko-dagang temuai besai laban ngembuan rampa letung enggau pulau ke manah ba kededua tekat ai HEP tu.
“Enggau pemansang ba kededua letung tu, semua orang dalam komuniti teulihka pemaik laban sida deka mayuh awak ari industri nya nyengkaum asil pengelandik jari Orang Ulu ti tebilang,” ku Tony.
Menteri penuh ke penudi komuniti Orang Ulu iya nya niang Dato Sri Joseph Balan Seling, ke nyadi menteri penuh rambau perintah dipegai Ya’akub, dalam taun 1970an. Sebedau iya, iya nya Dato Sri Tajang Laing.
“Orang UIu ari baruh ex- Ketuai Tetinggi, Temenggung Oyong Lawai Jau nyadi saksi pengawa nyain Sempekat Malaysia, nya alai kami ngarapka komuniti kami tu diaku dalam semua bidang,” ku Tony ngapil.
Iya mega ngarapka Kepala Menteri Datuk Amar Abang Johari Tun Openg datai ngabas komuniti Orang Ulu di Belaga ngambika iya empu ulih meda pekara ke patut digaga dikena nyungkak tikas pengidup enggau pengelantang peranak di menua Orang Ulu.
Berebak enggau nya, Ketuai Nembiak PRS Belaga, Robert Jeno madahka diri nyukung Liwan enggau Kaban Parlimen (MP) Ulu Rajang, Datuk Wilson Ugak Kumbong ba pengawa ngansak perintah nengeri meri pemerat ngagai peranak menua tu diambi bekereja ba projek HEP Bakun.
Naka ke diatu, semina 32.86 peratus tauka 70 iku ari penyampau semua pekereja 213 iku staf di Bakun, peranak menua ditu.
“Nengah pemujur perintah nengeri ngambi pulai Tekat Ai HEP Bakun , ukai pekara ke nyelai peranak menua nya diberi pemerat dalam sukut diambi gawa,” ku Robert.