SUPP PCB nyaup mutarka penanggul jalai sekut ba Lurung Stampin Tengah 5E
KUCHING: Ketuai Biro Sebana Mensia Mayuh Parti Sa’ati Rayat Sarawak (SUPP PCB), Wilfred Yap bedau lama ke udah datai baru nandu aum enggau orang ke diau sereta pengempu rumah ba Shefford View Neighbourhood di Lurung Stampin Tengah 5E.
Sida tu udah mantah pengawa ngena Lurung Stampin Tengah 5E, nyadi jalai besai penama ngagai projek kondominium ke diperambu.
Lebuhka baum, Yap udah dipadahka sida ke diau besemak enggau Shefford View Neighbourhood endang mantah sebarang jalai tama tauka jalai pansut entukar ari palan kondominium ke baru diperambu ngagai kandang endur diau ke diatu enggau jemah ila, ku iya madah ba penerang berita kemari.
Ke diatu, ku Yap, Lurung Stampin Tengah 5 (digazet lalu diengkah ba papan pemadah enggau lima tan pemerat sereta bisi lapan ngagai semilan bungkung ba jalai) udah kelalu berat enggau akses trafik ke diatu ditengah lebih 1000 iku sida ke diau.
“Jalai nya mega ditengah orang bukai ke ukai diau dia sereta entukar dagang ke nengah sereta mansa ari kandang GreenHeights nuju Batu 4, Jalai Penrissen ti ditambah agi enggau penyekut trafik maya jam pulai enggau mansang kereja.
“Kena 10 November 2016, SUPP PCB, udah ngarika sida ke diau ba Shefford View Neighbourhood nulis surat nuju Opis Menteri Pengatur Pengeraja Asal enggau Rampa Menua sereta Opis Tanah enggau Survei ngambika sida beratika bantah ba pekara nya.
“Taja pia, SUPP PCB enggau sida ke bekaul nya nadai nerima sebarang timbal ari opis bekuasa,” ku Yap.
Ku iya, sida ke kena pangka Shefford View Neighbourhood udah minta SUPP PCB ngenataika penanggul ditapi sida ngagai Kepala Menteri Datuk Amar Abang Johari Tun Openg.
Bala sida ngarapka opis bekuasa bekaul nentuka pemaju nengah Jalai Datuk Bandar Mustapha nyadi indu jalai ngagai palan ke dituju enggau pemansang komersial, ku iya.
Iya beratika sebarang penambah ba trafik deka ba Lurung Stampin Tengah 5 deka meri penanggul ke besai agi lalu deka ngeruga pengelikun, pengawa rama enggau pengidup sereta pengelantang lebih 1000 iku peranak ke diau dia.
Nitih ku Yap, SUPP PCB seruran sedia deka nyaup orang ti betapi enggau penusah tauka sida ke nemu penanggul ditapi mensia mayuh tang enda nemu baka ni deka mutarka iya.
Barang sapa ke deka minta bantu tau betelefon nuju SUPP PCB ba lumur 0167797688 tauak 082-246999 tauka ngelawa indu opis SUPP.