Beri mih pengelebih ngagai peranak Bakun/Belaga diambi gawa ba TAB

SIBU: Chairman Parti Keadilan Rakyat (PKR) Ulu Rajang Abun Sui Anyit minta perintah nengeri meri pengelebih ngagai peranak Bakun/Belaga diambi gawa ba Tekat Ai Bakun (TAB).

Ku Abun Sui, pengudah pengawa ngambi tekat ai nya, perintah nengeri bisi awak nusun baru Sarawak Hidro Sdn Bhd ari pangku pengawa pemadu tinggi ngagai renggat baruh.

Ku iya, tu (pengawa nusun baru) ulih mantu muka awak ngagai peranak menua nya bekereja ba tekat ai nya.

“Peranak Bakun/ Belaga patut diberi awak bekereja laban jasa enggau pengawa sida ngalahka diri mega sebagi ari pemujur tekat ai besai digaga,” ku iya madah ngagai pengarang berita kemari.

Nitih ku Abun, taja pia PKR Ulu Rajang nyambut manah sereta meri terima kasih ngagai Kepala Menteri Datuk Amar Abang Johari ba pengawa ngambi pulai Tekat Ai Bakun ari perintah besai.

Tang tu ukai reti PKR Ulu Rajang nyukung perambu ngaga mayuh agi tekat ai ke bukai di nengeri tu.

Pekara ti beguna endar ku iya, perintah nengeri patut berat agi ba isu-isu bekaul enggau penatai elekterik ti ditapi rayat kelebih agi ba kandang menua pesisir.

Kebuah pia, penanggul tu ukai isu lama lalu udah suah dibantai kandang beberapa taun ke udah.