Pemutus SPM pansut Hari Empat tu

PUTRAJAYA: Pemutus peresa Sijil Pelajaran Malaysia (SPM) 2016 deka dikeluarka Hari Empat tu ila, pia ku Opis Menteri Pelajar Malaysia (KPM).

Chalun tau ngambi pemutus ari sekula sida empu pengudah pukul 10 pagi.

Opis Menteri nya madah chalun ngatika diri deka nerima pemutus sida nengah pos tauka sida tau betelefon nuju Opis Pelajar Nengeri ba endur sida rejista peresa nya suba.

Chalun mega tau ngena servis meresa pemutus SPM 2016 nengah mySMS 15888 alai servis iya deka dibuka berengkah urung pukul 10 pagi kena 16 March lalu ditutup urung pukul 6 lemai kena 22 March.

Sepenyampau 434,535 iku chalun rejista napi peresa SPM 2016 ba 3,732 palan peresa di serata menua lalu ari penyampau nya, 377,194 iku chalun sekula perintah, bantu perintah enggau sekula agama bantu perintah seraya 9,094 iku chalun sekula ari baruh ejensi perintah kelimpah KPM (chunto iya Maktab Rendah Sains Mara).

Bisi 7,931 iku chalun ari sekula agama nengeri, 12,847 iku sekula peribit ti rejista enggau KPM, 25,713 iku chalun ngatika diri seraya 1,756 iku ke bukai chalun ari sekula sekondari Agama Rayat. — Bernama