S’wak pemansut kuasa lekterik pemadu besai jemah ila
Manggai ba taun 2050 semua bekal lekterik di serata Borneo deka datai ari Sarawak
KUCHING: Sarawak deka nyadi nengeri pemansut kuasa lekterik pemadu besai jemah ila, ku Kepala Menteri Datuk Amar Abang Johari Tun Openg.
Bejaku rambau Roadshow Transformasi Nasional 2050 ( TN50) di DeTAR Putra UNIMAS kemari, iya pechaya manggai ba taun 2050 semua bekal leterik di serata Borneo deka datai ari Sarawak.
“Kitai udah ngambi kuasa ngempu Palan HidroLektrik Bakun ari Perintah Besai lalu udah mega mekal lekterik ngagai Kalimantan.
“Diatu kitai deka ngangkatmanah sistem grid lektrik ke alai tembu ila, semua bekal lektrik di serata Borneo deka datai ari Sarawak,” ku iya.
Kelimpah ari nya, iya mega madahka Sarawak meseti ngembuan teknologi ke engkaman ngambi kuasa (lektrik) ulih ditukar nyadi kuasa solar.
Ku iya, nengah teknologi sereta pengelandik, atap rumah (nyengkaum rumah panjai) ulih mekal kuasa solar ngambi tau diguna ba dalam rumah.
Ngenang sentang Roadshow Transformasi Nasional 2050 ke bela digulu Menteri Nembiak enggau Lumba Khairy Jamaluddin, iya madahka Sarawak mega ngembuan visyen 2050 nyemaka Malaysia.
“Tang kitai deka nguna pengering enggau pemisi ke dikembuan endur ngemujur visyen nya.
“Nya mih pengelebih kitai lalu pengelebih nya deka nyaup Malaysia nyapai juluk TN50,” ku iya.
Iya nambah, perengka ICT entara pekara ti deka diangkatmanah ke tau dikearap ngembing Sarawak nyapai juluk TN50.
TN50 dilanchar Menteri Besai Datuk Seri Mohd Najib Tun Razak kena 19 Januari 2017 lalu nyadi sebengkah inisiatif nempa aspirasyen Malaysia manggai ba taun 2050.
Pengawa kemari digulu raban nembiak ari palan pelajar tinggi, parti politik sereta orang gawa perintah enggau kompeni.
Bela datai Menteri Kereja Raya Dato Sri Fadillah Yusuf, Menteri Nembiak, Lumba enggau Soladariti Dato Sri Michael Manyin enggau menteri kabinet bukai.