Kemeratka chara mungkus produk
KUCHING: Sapit Kepala Menteri Datuk Amar Douglas Uggah Embas minta egensi perintah ti ngemajuka orang dagang menua pesisir ngemeratka chara mungkus produk dikena nambahka penatai pemisi raban bansa menua nya.
Nitihku iya, chara mungkus beguna amat dikena ngelakuka produk.
“Orang Saribas chukup tebilang ngasilka produk bekualiti tinggi tang kualiti chara mungkus enda tau enda dikemanahka agi. Tu chara mungkus ke dikena ba taun 1960-an,” ku iya lebuh ke ngabas Pasar Ria nyerumba Pesta Bungin 2017, Betong, kemari.
Uggah minta pemesai ejensi ti mantu orang dagang menua pesisir ngambi ngenataika perambu sereta ungkup belanja ti diguna, ke tuju nya.
“Beri sida injin enggau latih ti betul awakka barang sida laku agi,” ku iya.
Uggah ti mega Menteri Betanam Betupi Moden enggau Ekonomi Menua Pesisir madahka chara mungkus ba tebal agi endur iya nya sama.
“Baka ni orang deka meli nya nyadi perais tauka tepa enti bungkus enda manah,” ku iya.
Dulu ari nya, lebuh bejaku maya bejadika pengerami nya iya minta peranak Genturung Pendiau Bungin ngetanka prestasi undi 100 peratus ngagai Barisan Nasional ba Pengawa Bepilih Besai Ke-14 ila.
“Enda lama agi kita deka ngundi, pajakka mih sukung ngagai Barisan Nasional.
“Pandangka sukung kita ngagai Kepala Menteri Datuk Amar Abang Johari Tun Openg laban iya gawa bebendar ke kitai peranak di menua pesisir,” ku iya.
Uggah madahka peminta peranak Genturung Pendiau Bungin ti dikena ngemanahka jalai kebun bedandang besai udah dikemendarka sepenyampau RM300,000.
“Jalai kebun bedandang besai amat beguna laban enti jalai enda manah, asil betanam enda ulih dibai pansut lalu enda ulih dijual,” ku iya.
“Ba pengerami nya Uggah udah ngemendarka RM30,000 ngagai pengatur Pesta Bungin enggau RM25,000 ari ADUN Saribas Mohd Razi Sitam enggau RM10,000 ari Robert Lawson Chuat, ti kala nyadi ADUN Bukit Saban.