Model atur belanja Sarawak ke baru deka dibantai: Abg Johari
KOTA SAMARAHAN: Model atur belanja ke baru ungkup Sarawak deka dibantaika Kepala Menteri Datuk Amar Abang Johari Tun Openg ba awak ke semak.
Ku iya, model nya dibantai ba bulan ti deka datai pengudah nerima pemendar ari Menteri Besai Datuk Seri Mohd Najib Tun Razak.
“Sarawak begunaka model atur belanja ke baru pengudah nengeri tu enda ulih bepanggai ba agih belanja ari Perintah Besai.
“Aku madah ke menteri besai aku bisi model atur belanja ke baru lalu nanya sekalika iya deka nyukung.
“Iya (Najib) madah ‘okay’ lalu aku deka mantaika nya ba bulan ti deka datai,” ku Abang Johari.
Iya mansutka jaku nya rambau ‘Roadshow Transformasi Nasional 2050 (TN50)’ ke diatur di DeTAR Putra UNIMAS kemari.
Ngenang kaul bukai, Abang Johari netapka raban ketuai meseti ngembuan integriti sereta bejalaika tanggungpengawa sida enggau lurus.
Netapka semua kabinet menteri udah ngangkat sumpah, iya madah pengawa nya tau nyeliah sida ari penyalah makai suap.
Ba Roadshow nya kemari, Menteri Nembiak enggau Lumba Khairy Jamaluddin ngansak peranak Malaysia nampai jauh ke mua kelimpah mutarka pemar ke bisi ayan ba maya ke diatu.
Ku iya, peranak Malaysia meseti ngaga perambu tumu tajapan napi pemar ke benung deka diputar.
“Urung 65 peratus batang pengawa ke bisi maya ke diatu enda diguna agi dalam timpuh 30 taun ti deka datai.
“Kelimpah ari nya, 40 peratus batang pengawa bukai disadang diganti robot tauka ‘artificial intelligence’ (AI),” ku Khairy.