Lebih 100 iku ngulu pengawa meri penerang pasal penyalah makai suap
KAPIT: Lebih 100 iku ke mega bala pengari enggau ketuai mayuh bengkah opis perintah ari kededua ejensi, perintah besai enggau nengeri, sereta bala ketuai raban bansa ditu mujur ngulu penerang pasal penyalah makai suap ti berambaika jaku ‘Role Of MACC and Honesty Vs Integrity’ diatur Komiti Nagang Pengawa Makai Suap Malaysia (SPRM) pampang Sibu ba bilik gempuru, Opis Residen di Kompleks Opis Nengeri, Jalai Bleteh kena Hari Lima.
Jaku penerang udah dikenataika Sapit Direktor (Operasyen) SPRM Sarawak, Zulhairy Bin Zaidel. Penerang tu mungkur nama reti makai suap, bansa enggau pekara ke disuap, pun pekara ke ngasuh makai suap, kelai makai suap enggau pangka ari makai suap ngagai orang ngatika diri enggau sida sebilik, gerempung, ekonomi sereta pengelikun menua.
Pengudah mendingka penerang, bala pesereta enggau temuai dipebasa bisi ngangkat sumpah integriti ti dibetuaika ASP Chew Swoi Kee, ari Opis Polis Kapit.
Sama bisi datai ngulu program Sapit Kanan Direktor SPRM pampang Sibu Jutim Nyagam, Residen Kapit Joseph Belayong Punan, Pemesai Pelilih Kapit Elvis Didit, Pemesai Pelilih Bukit Mabong Douglas Pungga, bala ketuai opis perintah besai enggau perintah nengeri sereta bala ketuai raban bansa ke bukai.
Kena Hari Enam, 11 Mac, program penerang SPRM ke sebaka (Pejalai Pengasih – SPRM Begulai Enggau Komuniti Sereta Peranak Kapit) deka diatur ba rumah panjai Iban, Rumah Bengau di Sungai Sut, Baleh ke alai Kaban Kunsil Nengeri (ADUN) Pelagus, Wilson Nyabong Ijang dipelaba datai bejadi program.