KM dipelaba ngemendar projek baru ungkup Bagi Menua Serian
SERIAN: Kepala Menteri Datuk Amar Abang Johari Tun Openg dipelaba deka ngemendarka projek baru ungkup Bagi Menua Serian lebuh iya datai ngelancharka Pesta Birumuh 2017 ditu, kena 1 April.
Menteri Raban Nembiak, Lumba enggau Penyerakup, Dato Sri Michael Manyin Jawong, madahka Bagi Menua Serian begunaka mayuh agi pemansang ngambika sebaka enggau bagi menua ke bukai di Sarawak.
Iya madahka aum udah diatur bedau lama ke udah antara iya, Residen Serian enggau pemesai pelilih berandauka projek baru ke diguna Serian.
“Aku pechaya kena 1 April tu, maya Pesta Birumuh, Kepala Menteri deka ngemendarka projek baru tu,” ku iya lebuh bejadika pengerami makai lemai diatur bala ketuai raban bansa Serian ba Balai Komuniti Serian kena Hari Lima.
Ngelansa pasal Pesta Birumuh 2017, ku Manyin, tu ketiga kali udah diatur pengudah keterubah iya diatur dalam taun 2009.
Pesta Birumuh kedua udah diatur dalam taun 2015, nyadi kenang pemadu manis lebuh ex- Kepala Menteri, niang Datuk Patinggi Tan Sri Adenan Satem madahka Serian diangkat nyadi bagi menua Sarawak ke-12, ku iya nambah.
Ku iya, pesta ungkup taun tu, deka bisi pengawa nasih tanah ba taba kompleks enggau palan konvensyen Bagi Menua Serian ke deka dipenyadi Abang Johari.
Iya mega bisi nyebut Abang Johari deka ngelancharka lumba bot remote control antarabansa ninting taun ba Taman Tasik Danu ditu.
“Niang Tok Nan (Adenan) ke ngelancharka projek ngemesaika pasar enggau palan bejalaika pengawa Bagi Menua Serian taun nyin tadi. Lebuh nya tembu, projek tu deka ngubah rampa menua di Serian laban deka bisi mayuh agi opis perintah, sereta mega 250 lot kedai ke baru enggau 500 lot endur diau.
“Ba palan konvensyen ke baru, tu deka nampung lebih ari 2,000 iku tauka 200 mija ba sesebengkah pengerami. Ke bisi diatu (Balai Komuniti Serian) deka direrak,” ku iya.
Ngenang pekara bukai, Manyin ke mega Kaban Kunsil Nengeri (ADUN) Tebedu madah pemansang di menua pesisir deka seruran dipejalai berindik ari semua ADUN ti ngarika kandang menua pesisir diagihka belanja penyampau RM5 juta ninting taun ari baruh Program Transformasyen Menua Pesisir (RTP) dikena bejalaika mayuh bengkah projek.
Ku iya, RTP, berengkah dipejalaika niang Adenan dalam taun 2015, deka seruran dipejalai kena ngenyemakka takah pemansang antara kandang menua pesisir enggau mengeri di Sarawak.
“Nengah agih belanja RTP kitai mujur ngaga sereta ngemanahka balai genturung pendiau, ngaga enggau ngemanahka jalai tasma nuju genturung pendiau enggau ke bukai. Di Serian, agi mayuh pengawa patut digaga.
“Genturung pendiau ditu udah disambung ngena jalai ke menyana, tebal agi genturung pendiau ngasaika bekal elekterik enggau mayuh udah nerima bekal ai beresi. Tang tu agi bedau chukup laban agi tubah genturung pendiau bisi kena bungkur sambung telefon sereta nadai ngasaika sambung internet ke laju.
“Nya alai, aram kitai bela gawa begulai nentuka Serian tu badu agi tinggal di belakang. Nyema Bagi Menua Kuching udah jauh mansang, Serian mega patut bela mansang,” ku iya.
Residen Serian Jonathan Lugoh enggau Temenggong Bidayuh Serian Henry Bujang Sadok mega bisi bejaku rambau pengerami nya, ke diatur dikena ngelaluka pemesai perintah ke baru ba Serian sereta meri basa ngagai expemesai enggau ketuai raban bansa enggau ketuai genturung pendiau ke pinchin.
Sama bisi datai ADUN Kedup Martin Ben, ADUN Bukit Semuja John Ilus, Sekretari Politik Kepala Menteri John David Nyauh, Pemesai Pelilih Serian Lim Hock Meng, Pemesai Pelilih Tebedu Raymond Achen enggau ex- Residen Serian Dahim Nadot.