Raban orang indu diperansang besaup ngemansangka nengeri, ku Juma’ani
KUCHING: Bini Kepala Menteri, Datin Amar Dato Juma’ani Tun Tuanku Bujang meransang raban orang indu di nengeri tu sama besaup sereta beserakup ngemajuka nengeri tu.
Iya ngarapka bida jalai pengarap, bansa sereta pangku pengawa ukai nyadika penanggul ngagai raban orang indu deka sama enggau ngemansangka nengeri tu.
“Aku amat ngarapka orang indu Nengeri sarawak deka terus maju ke mua dikena nyapai penyulut pemansang nengeri tu ti dikesayauka kitai semua.
“Kitai orang indu patut bisi kerejasama lalu ngembuan runding enggau ati ti lurus, segulai sejalai enggau pangan diri enda ngira sekalika enggau lelaki tauka indu, ti enda ngira peninggi pangku pengawa, bansa enggau jalai pengarap,” ku iya.
Juma’ani mansutka pekara nya lebuh ke bejadika pengerami Pengerami Hari Orang Indu Antarabansa 2017 Renggat Nengeri Sarawak ke diatur Opis Menteri Pengintu Pengelantang Pendiau, Orang Indu enggau Pengelantang Raban Bansa ba Pusat Pembangunan Pendidikan Yayasan Sarawak ditu, kemari.
Berebak enggau tu Juma’ani madahka diri temegah ati ngagai penyulut orang indu di Malaysia nyengkaum dua iku tokoh indu ti pemadu dikerindu sereta dikemegahka iya, Tan Sri Zainun Munshi Sulaiman tauka dikelala enggau nama Ibu Zain enggau Tan Sri Dato sri Dr. Zeti Akhtar Aziz.
“Aku temegah ati ngagai penyulut orang indu dalam bidang korporat enggau pengawa dagang di Malaysia diatu.
“Orang indu udah mujur betapi enggau mayuh penguji nyentuk udah megai pangku pengawa ke tinggi sekalika dalam sektor perintah tauka peribit,” ku iya.
Berebak enggau tu Juma’ani diberi basa bejadika Standard Operation Procedure ( SOP) Cepat, Cekap & Tepat ( CCT) dikena mantu ngetuka ulah nyamah orang indu enggau anak mit di nengeri tu.
Pengerami Hari Orang Indu Antarabansa ke diintu ninting 8 Mac di serata dunya, ba taun 2017 berambaika jaku ‘Be Bold For Change’ lalu renggat nengeri Sarawak ke dikerami kemari (11 Mac) nti berambaika jaku ‘Women’s Power’.
Pengerami ninting taun nya sebengkah ari chara dikena ngaku enggau meri terima kasih ngagai raban orang indu ti udah nyaup sereta nyereta pengawa ngemansangka ekonomi, rama, politik enggau nyadi ketuai di Sarawak kelebih agi sereta di Malaysia.
Entara aktiviti tauka program diatur nyerumba pengerami Hari Orang Indu Antarabansa Renggat Nengeri Sarawak iya nya pengawa pemansang; licha pengerai, Juh Zumba enggau enchabut tiket benasit.
Sama bisi datai ba pengerami nya kemari bini Sapit Kepala Menteri Datin Amar Doreen Mayang, Menteri Pengintu Pengelantang Pendiau, Orang Indu enggau Pengelantang Raban Bansa Datuk Fatimah Abdullah, Menteri Muda Pelajar Tumu Anak Mit enggau Pemansang Ruang Bilik Sharifah Hasidah Sayeed Aman Ghazali enggau ke bukai.