Tetiap iku YB diberi agih belanja RM5 juta setaun
Agih belanja nya tau dikena ngaga projek mit baka jalai alun, parit enggau jematan
KOTA SAMARAHAN: Kepala Menteri Datuk Amar Abang Johari ngelalau raban pengari rayat ( YB) nguna manah agih belanja ke diungkup ba Projek Transformasyen Menua Pesisir (RTP).
Enti iya ( YB) enda nguna agih belanja RTP ungkup projek mit di menua pesisir, ganti YB nya. Datuk Amar Abang Johari Kepala Menteri Sarawak
Ku iya, nengah RTP tetiap iku YB diberi RM5 juta setaun ngambi tau dikena ngaga projek mit baka jalai alun, parit enggau jematan.
“Semua YB di Sarawak nerima agih belanja tu ngambi tau dikena ngaga projek mit di menua pesisir. Enti jalai bebatu, guna mih duit nya dikena melakin jalai.
“Anang nganti bantu belanja ari Kuala Lumpur, semua dah diberi RM5 juta setaun.
“Enti iya (YB) enda nguna agih belanja RTP ungkup projek mit di menua pesisir, ganti YB nya,” ku iya.
Abang Johari mansutka jaku nya ba randau ‘ Road- show Transformasi Nasional 2050 ( TN50) di DeTAR Putra UNIMAS di Kota Samarahan kemari.
RTP nyadi sebengkah pengawa perintah dikena ngemansang kandang menua pesisir ti nyendia belanja RM5 juta setaun ungkup tetiap sitak kunsil nengeri.
Abang Johari ke nyadi Chairman Barisan Nasional ( BN) Nengeri netap tetiap sebana ari rayat deka ngelaika YB nya enda kreatif ngintu sitak diri.
“Setaun RM5 juta diberi, reti nya serenggat manggai RM25 juta lalu ketegal nya sida ( YB) meseti ngemujurka tanggungpengawa diri.
“Enti diganti jemah, anang nyalahka aku, salahka diri empu laban duit udah diberi,” ku iya.
Tajapia, lebuh dikerandau pemberita pengudah tembu randau nya, Abang Johari madah naka ke diatu semua YB Sarawak udah bejalaika tanggungpengawa enggau manah.
Ngenang kaul ke sama, Abang Johari ngelalau bala YB ngembuan runding ti seruran deka meri servis ngagai rayat.
Ku iya, sida patut beratka rayat lalu enti deka beambi ulih nyadi orang dagang, lengkaka pangku pengawa nyadi YB.
“Ba politik, tuju nuan sigi deka mantu rayat lalu enti nuan nguna politik ketegal ti deka ngambi duit, nya ukai politik.
“Tetiap nengeri enda nyapai pemujur enti pekara ti mai penguntung diri enggau pengawa mantu rayat begulai,” tandu Abang Johari.