Uggah: Kemayuhka bansa utai tanam komersial
Dikena napi gaya ekonomi dunya ti majak enda meruan lalu negapka penatai pemisi pekebun jemah ila
KUCHING: Perintah Nengeri diatu deka ngenegapka utai tanam komersial ngambika bala pekebun bisi penatai pemisi ke manah agi jemah ila, pia ku Sapit Kepala Menteri Datuk Amar Douglas Uggah Embas.
Ku iya, kelimpah ari sawit utai tanam bukai ti udah dikelala Opis Menteri Betanam Betupi Moden enggau Ekonomi Menua Pesisir baka getah, lada, nyiur, nenas enggau rian.
“Laban kitai betapi enggau gaya ekonomi dunya ti majak berubah, kitai enda tau enda netapka penuduk diri ngambika ulih napi sebarang gaya ekonomi ti enda meruan bekaul enggau sebarang utai tanam. Nya alai ari sukut pemansut utai tanam komersial, kitai enda tau enda ngemayuhka agi bansa ngambika pekebun bisi penatai pemisi ke tegap,” ku Uggah madah ngagai The Borneo Post ditu kemari.
Ku iya, chara nya praktikal agi ari ke semina beratka sebansa utai tanam aja, baka sawit.
Ba sentang sawit, Uggah ke mega Menteri Betanam Betupi Moden enggau Ekonomi Menua Pesisir, madahka opis menteri iya deka ngaga pelin besai enda lama agi. Diatu bisi 1.4 million hektar udah ditanam enggau utai tanam ke beguna.
“Kitai agi bisi mayuh tanah endur ngerembaika dandang kebun sawit tang kitai enda tau enda berandau dulu enggau orang ke bisi pemerat ba pekara nya, sentang pengawa ti deka dipejalaika kitai udah tu. Nya kebuah kitai begunaka pelin besai ,” ku iya tang enda madah silik pasal pekara nya.
Ba pekara ke sama, Uggah ke mega ex- Menteri Industri Betanam Betupi enggau Komoditi, madahka Perintah Besai nengah Opis Minyak Sawit Malaysia (MPOB) enggau Kaunsil Minyak Sawit Malaysia( MPOC) udah majak mantu industri minyak sawit nyeliahka kimpin ke enda manah ti dipejalai NGO ari menua Eropah ti bejai minyak sawit menua tu.
“Kitai bisi dua buah gerempung tu mantu perintah enggau pekebun ngai makit dunya, ke alai sawit tu enda ngerusak rampa menua laban kitai ngemeranka chara betanam ke manah,” ku iya.
Iya mega madahka Malaysia mega udah bisi setipikit Roundtable on Sustainable Palm Oil (RSPO) enggau setipikit Malaysian Standard on Malaysian Sustainable Palm Oil (MSPO), ke alai setipikit MSPO ngenukuka industri sawit menua ulih ngenanka pemanah rampa menua lalu ukai ngerusak.
Ku Uggah, siti pemar besai ti ditapi industri sawit iya nya NGO di Eropah seruran “ngubah runding sida belama ”.
“Nya kebuah kitai enda tau enda ngemayuh utai tanam laban nya ulih nyaup ngenegapka penatai pemisi pekebun. Ba pekara nya, kitai enda tau enda niru chara holistik ti ukai semina ulih ngenegapka utai tanam aja tanam mega pengawa betanam betupi nyengkaum nupi jelu, ikan enggau ke bukai,” ku iya.
Laban kitai betapi enggau gaya ekonomi dunya ti majak berubah, kitai enda tau enda netapka penuduk diri ngambika ulih napi sebarang gaya ekonomi ti enda meruan bekaul enggau sebarang utai tanam. Nya alai ari sukut pemansut utai tanam komersial, kitai enda tau enda ngemayuhka agi bansa ngambika pekebun bisi penatai pemisi ke tegap. Datuk Amar Douglas Uggah Embas Sapit Kepala Menteri Sarawak