Nembiak rebak baru patut neladan ulah Niang Wong Soon Kai: Abg Jo

KUCHING: Nembiak rebak baru kelebih agi bansa China patut nunda ulah Niang Datuk Patinggi Tan Sri Dr Wong Soon Kai.

Kepala Menteri Datuk Amar Abang Johari Tun Openg madah, ba pengawa Soon Kai dalam politik kenyau ari taun 1974, niang dekaka bansa China beserakup sereta ngambi bagi chara positif ba pengawa ngemansang menua.

“Soon Kai seiku ketuai ke mentas sereta ngembuan runding ke tegap. Peny- erakup dalam Parti Sa’ati Rakyat Sarawak( SUPP) maya jeman iya chukup tegap.

“Iya mih ke muka jalai ngambika bansa China ulih ngambi bagi ukai semina ba politik tang mega perintah,’ku Abang Johari maya dikerandau pengarang berita pengudah meri basa ke penudi ngagai Soon Kai di rumah iya ditu, kemari.

Abang Johari nambah Soon Kai chukup beratka penyerakup nyentukka iya ngelengka profesion diri lalu nyadi sebagi ketuai dalam tim ti ngemansang Sarawak.

“Maya Soon Kai berengkah gawa ba perintah iya nya ba maya Tun Rahman enggau Tun Taib, iya ngarika bansa China.

‘Berengkah ari maya nya bansa China udah bejalaika pengawa enggau chakah ba atur pemansang Sarawak,’ku Abang Johari nambah.

Soon Kai midang di rumah iya urung jam 4 dini hari Hari Tiga tu tadi.

Iya nyadi peranak Sarawak keterubah mujur nyadi pakar buntas di Britain ba taun 1959.

Niang ke beumur 90 taun, kala nyadi Sapit Kepala Menteri enggau Presiden SUPP ari taun 1991 nyentuk ngagai 1996.

Bela datai meri basa ngagai Soon Kai iya nya kededua Sapit Kepala Menteri Tan Sri James Masing enggau Datuk Amar Douglas Uggah, Menteri Pengatur Pengeraja Asal enggau Rampa Menua II Datuk Amar Awang Tengah Ali Hassan enggau menteri bukai.